The Definitive Guide to Living in the Capital , Cairo , Egypt

خوض التجربة من أولها، الموضوع مش في قعدة القهوة نفسها، الموضوع في شوية التمشية اللي هـ تعملهم قبل ما توصل لقهوة «اللورد» الموجودة في شارع المعز في منطقة الحسين. املأ وجدانك من المنطقة العريقة والمدقات الطويلة والمآذن العالية اللي هـ تبقى على يمينك وشمالك من أول ما تدخل شارع المعز من ناحية خان الخليلي خلف مسجد سيدنا الحسين، هـ تقف في السكة 100 مرة علشان تتفرج على كل حجر في كل مبنى حواليك، ولو كنت هنا بعد المغرب هـ تشوف إضاءات مميزة من الأرضيات وعلى أبواب المساجد ومن محلات الحلي المنتشرة في كل المنطقة. صحيح الشارع فقد كثير من رونقه بسبب عدم اهتمام الجهات المسؤولة في الدولة بعد الثورة وبسبب أن السياحة كل يوم بحال، وبقى فيه بعض مظاهر الفوضى، لكن يظل شارع المعز “اللي بـ ننتهز الفرصة في كايرو 360 كل فترة علشان نكتب عنه” واحد من أيقونات المناطق الأثرية في القاهرة وواحد من أماكننا المفضلة اللي ما بـ نزهقش من زيارتها ولا الكلام عنها.

بعد التمشية الطويلة وبعد ما أخذنا الشارع رايح جاي من أول خان الخليلي لحد “بابا عبده” ملك الساندويتشات في باب الفتوح قررنا نأخذ الشاي في «قهوة اللورد» الموجودة في منتصف الشارع. القهوة نار على علم، اسأل أي حد في المنطقة على “اللورد” هـ يدلك على طول. القهوة مشهورة بأنها حاطة تمثال بالحجم الطبيعي لأم كلثوم وبـ تشغل أغانيها طوال الوقت، القهوجي هنا شخصية ظريفة ومتعود على التعامل مع الأجانب والمصريين بحكم طبيعة المكان، ولابس طربوش ويونيفورم مستوحى من الحضارة العثمانية، علشان يبقى جزء من الشكل التراثي للمقهى اللي حاطط ديكورات وإكسسوارات بـ تجمع بين شوية حاجات من الماضي لكن من عصور وفترات زمنية مختلفة، زي عربيات الخيل أو “الهودج” والتراس الأرابيسك اللي عليه تمثالين لحسن ونعيمة، على الجدران تابلوهات لجمال عبد الناصر والسادات وصور من شوارع مصر أيام محمد علي باشا وغيره، المكان بصراحة رغم اللخبطة التاريخية اللي فيه إلا أنه فيه عبق وطاقة نفسية كبيرة، وأسعاره غالية شوية طبعًا علشان أنت بـ تدفع ثمن كل حاجة عينيك شايفاها وكل خطوة مشيتها في شارع المعز. العصير الفريش بـ 15 جنيه، والسحلب 15 جنيه والشاي في البراد بـ 10 جنيه، الشيشة التفاح هنا وصاية وخدمة الشيشة سريعة ومنتبهة وسعرها 20 جنيه، وهـ تدفع خدمة حوالي 8 جنيه. بس نصيحة بلاش العصائر الفريش هنا، بالذات المانجو علشان ما عجبتناش لا هي ولا البرتقال، خليك في المشروبات الساخنة والشيشة، وهـ تنبسط. وما تنساش تأخذ شوية صور مع كل الأنتيكات اللي حواليك، وأهم حاجة تأخذ صورة بالطربوش اللي القهوجي هـ يجيبه لك مخصوص علشان الصور التذكارية، لأنه من علامات المكان المميزة.

لو زرت قهوة «اللورد» اكتب لنا عن تجربتك.