The Definitive Guide to Living in the Capital , Cairo , Egypt

في مقولة شهيرة بتقول “لو ضحكت عليا مرة فالعيب عليك، ولو ضحكت عليا مرتين فالعيب فيا أنا”.الكلام ده فضل في دماغنا من ساعة لتجربتنا غير الموفقة لفرع”قهوة” في ووتر واي، بس الفكرة إنهم عملوا منيو جديدة، فقررنا نخاطر ونروح فرعهم في أركان بلازا.

منيو قهوة كبيرة ومتنوعة، من مشروبات الديتوكس والآيس تي المنعشة لأطباق الجبنة اللذيذة مع ساندويتشات البيض الجديدة، وكمان قسم مخصوص للأطفال يشمل أطباق زي Chicken Lolipops، والأكيد إن مافيش مطاعم كتيرة تقدر تنافس منيو الفطار عند قهوة.

وصل الجرسون ومعاهPeach Tea Punch  (سعره 30 جنيه) وسلة عيش طازة. نبتدي الحكاية مع الصوصات، وأكتر حاجة خطفت قلوبنا منهم كان الحمص اللذيذ. كان سهل علينا إننا نخلص العيش كله في ثواني، بس قررنا نمسك نفسنا علشان نقدر نخلص الأكل اللي طلبناه. بالنسبة للشاي الأحمر بنكهة الخوخ فكان مُنعش وطعم الخوخ واضح فيه، لكن ماحسيناش بطعم النعناع والليمون والبرتقال المكتوبين في المنيو.

بدأنا الأكل مع Waldorf Salad (سعره 52 جنيه). السلاطة عبارة عن طبق ضخم فيه خس وعليه عين جمل وبلو تشيز المعروف عنها طعمها القوي وعملت توازن مع طعم العنب الأحمر ومكعبات التفاح الأخضر اللاذع والمسكر في نفس الوقت.

بعدها كان الدور على Truffle Omelet (سعره 67 جنيه) ومعاه Mincy Bendict (سعره 62 جنيه). الأول عبارة عن بيض بالثوم وعليه جبنة تروفل، والنتيجة أومليت خفيف ومستوي كويس وله نكهة مميزة، والطبق بيتقدم معاه مكعبات بطاطس ومشروم بورتوبيلو تحفة. البصل المقلي كمان عمل قرمشة وطعم لذيذ للأكل وأضاف طعم مسكر.

أما الطبق التاني فعبارة عن بيضتين مقليين على بطاطس ويدجز ولحمة مفرومة مع الطماطم والبهارات وجبنة لذيذة. يمكن شكل تقديم الطبق والبيض المقلي مش على المستوى، لكن الجمال في الموضوع إنهم عملوا من البيض حاجة زي التشيلي تشيز فرايز، وفعلًا يعتبر طبق ممتاز لوجبة برانش ممتعة.

كنا غلطانين لما افتكرنا إن مش ممكن نجرب حاجة أحلى من كده، لغاية الجرسون ما نصحنا نجربMelting Chocolate Bomb  (سعره 45 جنيه) ودي على فكرة مش مكتوبة في المنيو.

طبق الحلو عبارة عن طبقتين كيك شوكولاتة غنية وفي النص شوكولاتة بالبندق لها قوام مقرمش لذيذ.

كل الكلام اللي فات ده عليه كرة شوكولاتة بتسيح لما الجرسون يصب عليها شوكولاتة سخنة، وفجأة نكتشف إن الكرة مستخبي فيها بولة آيس كريم فانيليا. يمكن الطبق مسكر جدًا ومليان شوكولاتة، بس يستاهل كل كالوري.

صحيح زيارتنا كانت يوم الجمعة الصبح – أزحم يوم عند قهوة – بس الخدمة كانت هايلة وسريعة، وكمان كل الأصناف اللي جربناها من المنيو الجديدة كانت هايلة، وبصراحة مش عارفين سبب تجربتنا السيئة معاهم المرة اللي فاتت.