The Definitive Guide to Living in the Capital , Cairo , Egypt

للوهلة الأولى، تشعر أن كافيهات القاهرة كاملة متكاملة؛ أجواء لطيفة، تصميمات مبهرة وموقع مميز، بعد شوية، لما تقرر تجرب مكان منهم، ينتهى بك الأمر لإحباط لم يسبق له مثيل.

فى شارع من شوارع الشيخ زايد الهادئة، “قهفة – Kahve” بـ يلفت الأنظار باسمه التركى (قهفة يعني قهوة بالتركي) وأجواءه المريحة. المكان مساحته معقولة، باختيارين للقعدة فى خارج وداخل المكان، ورغم أنه كان مليان ع الآخر وقت زيارتنا، الجو كان محافظ على هدوءه، بحيث تقدر تقرأ كتاب أو تستمع بخروجة لطيفة.

طلبنا من الجرسون يجهز لنا ترابيزة، وفورًا بدأ فى تضبيط واحدة لنا، المنيوهات كانت فى انتظارنا، ومن هنا بدأت رحلة اختيار طلبنا، المنيو مش كبيرة من ناحية التنوع، لكنها كافية.

“قهفة” بـ يقدم مشروبات ساخنة (15.50: 21 جنيه) معظمها من مشتقات القهوة، وكان الأبرز من بينهم قهوة تركى بالنوتيلا (16.50 جنيه). متوفر كمان مشروبات ميلك شيك مثلجة، كوكتيلات وسموزى (19: 29.75 جنيه)، بالنسبة للأكل، لاحظنا مجموعة من الحوادق تشمل ساندويتشات، وكرواسونات محشية (11.50 جنيه)، بيتزا وكريب (25.75 جنيه). الحلويات كمان لها ظهور يشمل شوكليت فوندو (29.75 جنيه)، وافلز (15.75 جنيه)، وتارت، ومافينز، وكوكيز ودوناتس، آخر قسم فى المنيو كان للشيشة، وطبعًا بـ يقدموا كل النكهات (20: 30 جنيه).

بداية النهاية كانت لما بدأنا نقول للجرسون على الطلب، المدهش أنه ما عندوش فكرة عن كثير من أصناف المنيو. بعدها رفض طلبنا لبيتزا سلامى وادعى أن إضافات البيتزا الوحيدة الموجودة هى هوت دوج، ومشروم وجبن. بعد حالة من الذهول والضيق إلى حد ما، طلبنا اثنين بيتزا، واحدة هوت دوج والثانية عشاق الجبنة (سعر أى واحدة منهم 27.75 جنيه)، وشاى أخضر، ومياه وقطعة شوكليت لوفرز (30 جنيه).

بعد وقت طويل يوصل لساعة إلا ربع، ترابيزتنا فضلت فاضية بنفس شكلها وقت ما وصلنا، البيتزا والحلو وصلوا بعد ما طلبناهم ثلاث مرات، والشاى والمياه وصلوا بعد ما طلبناهم مرتين كمان من الجرسون، حجم البيتزا كان صغير، ورفيعة، ومقرمشة وغرقانة جبنة؛ فعلاً طعمها كان لذيذ، لكن مش مشبعة. صعب نقول نفس الكلام على الحلو، والسبب هو نقص كمية الآيس كريم وصوص الشوكولاتة، غير أن مافيش أى مكسرات زى ما مكتوب فى المنيو والكيكة نفسها كانت عديمة الطعم.

بشكل عام، كافيه “قهفة” محبط، ورغم أجواءه اللطيفة، لكنه كارثى على مستوى الخدمة. البيتزا هائلة مافيش كلام، لكن الأكيد أنها لا تستحق الانتظار. الشوكليت لوفرز كانت فى منتهى السوء ونسيان الجرسون لطلبنا كتب مشهد النهاية الكئيب.