The Definitive Guide to Living in the Capital , Cairo , Egypt

من المؤكد أن مافيش نقص فى عدد الأماكن اللى بـ تقدم الإفطار والإفطار المتأخر فى المعادى، وعادة بـ يتعاملوا على أنهم أماكن خروج مبكرة، الأكل فيها مش حاجة أساسية. فينو، الأخ الأكبر لفينو بيكرى فى شارع 213 فى دجلة والموجود فوقه مباشرة، بـ يحاول يجذب الزبائن اللى تركيزهم الأساسى هو الأكل. مكان فينو فوق المخبز جنب المطعم الجديد كايرو كيتشين، وبـ يقدم مجموعة من وجبات الإفطار البسيطة.

الاختيارات اللى بـ يقدمها فينو تقليدية: اختيارات الإفطار زى البيض، والبان كيكس والوافلز، ومعاهم معجناتهم الخاصة. واحد جرئ من مجموعتنا اختار ويسترن أومليت (عبارة عن جبن، وفلفل وبيكون وده سعره 38 جنيه) ومجموعة من البان كيكس (29 جنيه)، والطلبات الثانية شملت بيض مقلى (29 جنيه)، بيجل (5 جنيه) وكومبو فروت سلاط (35 جنيه مع قهوة وعصير).
وصلت المشروبات سريعًا مع جرسون مبتسم، وبعدين رجع ثانى وطلب أنه يشيل الملاعق، وده خلق حالة من الارتباك. رجعت الملاعق المغسولة بعد كده مع فروت سلاط هدية لكل واحد فينا، مع طبق أكبر للشخص اللى كان طالب فروت سلاط من الأساس.
خليط الفاكهة اللذيذ كان عبارة عن بطيخ، وبرقوق، وتوت برى، وتفاح وموز، كلهم فى عصير محلى بسكر خفيف. ما عداش عشر دقائق إلا وبدأ تقديم باقى الأطباق، مع مربى وزبدة مصرى. الأومليت كان محتاج يتسخن أحسن، وعلشان كده الجرسون أخذه بسرعة علشان يسخنه دقيقة كمان. ورغم أن ما حصلش تحسن كبير بعد تسخين الأومليت فى الميكروويف، بس هو كان مليان قطع كثيرة من الفلفل واللحم. أما البيض المقلى فكان خفيف ومنفوش، وكمان قطع البطاطس البيوريه المقلية المصاحبة للبيض كانت مطبوخة كويس؛ طرية من الداخل ومقرمشة من الخارج.
الحاجة السلبية الوحيدة كانت وصول البيجل السادة بعد تقديم باقى الأكل، وتُقدم على الترابيزة من غير أى شكل جمالى أو حتى زبدة. ونظرًا إلى أن المخبز فى الدور اللى تحت جزء لا يتجزأ من جاذبية مطعم فينو، كنا نتوقع أن التواصل بين الاثنين يبقى أفضل.
تكلفة الإفطار بين 35 و60 جنيه للفرد من أكل ومشروبات، متضمنة الضريبة والخدمة. فينو بـ يقدم فى الويك إند إفطار من 7 صباحًا لحد الظهر، بجانب قائمتهم التقليدية.
وصلت مجموعتنا الصبح، والترابيزات بدأت تفضى قبل وقت الظهر. صحيح أن فيه مخابز وكافيهات ثانية فى المعادى بـ تقدم أماكن جلوس أفضل، بس بالمقارنة مع أماكن الإفطار المشهورة اللى محتاجة وقت انتظار طويل وخدمتهم مش قد كده، نقدر نقول أن منيو فينو المبسطة، مع الخدمة السريعة والأسعار الكلاسيكية تعتبر اختيار مهم لكل عشاق وجبة الإفطار.