The Definitive Guide to Living in the Capital , Cairo , Egypt

الشيخ زايد مش هتبطل تبهرنا كل شوية بمكان جديد يفتح فيها، وفى وقت قليل وقياسي، بس اللى انتشر أوى فى الفترة الأخيرة هو أماكن الفوود كورت أو مجمع المطاعم والكافيهات، أحدثها هو "كيرف مول – Curve Mall" الموجود ورا "تيفولى زايد – Tivoli Zayed" بالضبط، المكان أى نعم لسه مش فاتح فيه غير مطعمين منهم "فيكا – Fika" اللى هنكلمكم عنه دلوقت، لكن إحنا شايفين أن له روح وجو مختلف هيعجب سكان زايد، عيبه الوحيد بس أنه بيطل على عمارات وشارع رئيسي.

معرفتنا بالمكان برضه كانت من خلال صفحته على الفيسبوك، شكل الديكور واللوجو المبهج بألوانه شدونا، بس اللى شدنا أكثر صور أطباق وأصناف الفطار اللى بيقدموها، يوم ما رحنا كان الجو مشمس والهوا معتدل، المكان نفسه ألوانه هادية مريحة للأعصاب وعاملين حركة حلوة أوى على الحيطة حاطين ديكور عبارة عن كتب كتيرة صفحاتها مفتوحة كانت مبتكرة الصراحة.

المنيو بسيطة ومش فيها أصناف كثيرة لكن فى نفس الوقت شكلها شهي ومش تقليدية، اختارنا Fika Breakfast بـ (50 جنيه) وده عبارة عن بيض (معمول بالطريقة اللى تحبها فاختارناه أومليت) معاه شاي أو قهوة وعصير برتقال وعيش توست محمص ومربى وعسل وزبدة، وسألنا الجرسون لو حابين نضيف جبنة زيادة على الأومليت (6 جنيه)، وكمان ضيفنا على الشاي لبن (4 جنيه)، كمان طلبنا أومليت بالسبانخ والمشروم (32 جنيه)، عامة كل أنواع الأومليت بينزل معاها بطاطس ويدجز ومشروم بالتوابل على قطعة من العيش المحمص، وللتحلية اختارنا فرينش توست بالكريم تشيز والفراولة (28 جنيه).

طلبنا ما أخذش وقت كبير، أول حاجة لازم نعلق عليها طريقة التقديم، تفتح نفس اللى مش جعان، أومليت البيض الذهبي معمول رول وتحته قطعة عيش محمص وعلى الجنب البطاطس والمشروم السوتيه بالبهارات، مش قادرين نوصف لكم جمال تنفيذ الأومليت وتقديمه، خاصة اللى بالسبانخ، حاجة كده من مكان تانى خالص، البطاطس توابلها كانت مضبوطة وهى طرية وتحميرها كويس، اللى كان بس لنا تعليق عليه المشروم لأن ملحه كان زيادة شوية لدرجة ما قدرناش ناكله كله وبلغنا الجرسون بكده.

عصير البرتقال كمان ما كانش طبيعي، حلو بزيادة وفريش ومافيهوش مزازة عصاير البرتقال اللى بتتقدم فى الأماكن التانية، ما كناش عاوزينه يخلص، حتى تحميص التوست كان مضبوط زى الكتاب ما بيقول، مسك الختام بقى الفرينش توست بالكريم تشيز، دى أول مرة نذوق كريم تشيز خفيفة كده، والتوست كان ذهبي وإضافة الفراولة من فوق أضافت للطعم كتير، حقيقي بطننا اتبسطت ونفسنا اتفتحت أننا نبدأ يومنا بنشاط وطاقة.

"فيكا" أكيد لازم نروحه تانى علشان نجرب أطباقه وساندويتشاته، وممكن نعزم أصحابنا فيه، فيه حد يفوت فرصة أنه يلاقى مكان جميل وما يروحوش تانى؟