The Definitive Guide to Living in the Capital , Cairo , Egypt

للناس اللي بـ تروح من وقت للثاني فنادق 3 أو 4 نجوم في مصر، هـ يحسوا أن
فلامنكو كافيه زي أي كافيه في أي فندق، هـ تلاقيه موجود في الدور الأول في فندق
فلامنكو فوق “كارمن”، فلامنكو كافيه بـ يقدم
وجبات ومشروبات كميتها متوسطة وبأسعار غالية.

سهل أنك تدخل
المطعم والكافيه من السلم الرئيسي للفندق، مكون من 10 ترابيزات وكل ترابيزة تكفي
5 أشخاص، نصف الإضاءات مش شغالة يعني المكان مظلم شوية بس بـ يبقى منور جدًا لو
روحته الصبح. المكان فيه شبابيك كثيرة بس المنظر اللي بـ تبص عليه مباني عادية وشارع
الجزيرة الوسطى. وقت زيارتنا كانت الترابيزات مغطاة باللون الأصفر والكستنائي والكراسي
مصنوعة من الخشب وعلى الترابيزات مناديل صفراء وفازة بيضاء فيها ورود. ديكور
الحائط عبارة عن صور مظلمة وساخرة بـ تضيف للمكان بعض الحيوية.

طلبنا
كابتشينو كبير وجاء لنا في كوبايات صغيرة. كانوا مش مليانين قوي وما كانش فيهم أي حاجة
جديدة، القهوة كانت من غير طعم وسادة. طلبنا الستيك بـ 66 جنيه وكلوب ساندويتش بـ
34 جنيه وقدموه في أطباق صغيرة. الستيك كان مستوي كويس وكان معاه طبق جانبي من
الأرز، والكلوب ساندويتش كان بارد وما كانش فيه لحم إلا حاجة بسيطة جدًا ومع شوية
مخلل بسيط وشيبسي. لو حد حب يروح هناك فمن الأفضل أنك تطلب الأطباق المشوية.

المنيو فيه
مختارات كثيرة بأسعار زي المطاعم الثانية. فلامنكو كافيه مافيهوش أي اختلاف،
والواحد هـ يفكر مرتين قبل ما يدفع نفس المبلغ اللي بـ يدفعه في مطاعم ثانية بـ تقدم
أكل أحسن. وطريقة تقديم الوجبات ما كانتش حلوة خالص.

أسعار
المقبلات، والشوربة، والسلاطات من 15 إلى 55 جنيه وده للسلامون. الأطباق
الرئيسية مكونة من اللحمة أو السمك والبيتزا والمكرونة أسعارها بـ تتراوح ما بين
30 و110 جنيه وده ثمن أغلى طبق اللي هو الجمبري المشوي.

كان فيه 2
عاملين فقط في الكافيه وقت زيارتنا للمكان، ورغم أن المكان كان فاضي بس قعدنا 20
دقيقة لغاية ما جاء لنا الكابتشينو. العاملين هناك لطاف بس مش بـ يسألوا أي أسئلة
عن الأكل أو المشروبات زي الأماكن الثانية. واجهنا صعوبة وقت ما طلبنا الحساب لأننا
ما لاقيناش أي عامل نطلبه منه.

مافيش حاجة
في المكان مميزة عن أي مكان ثاني، أي كافيه ممكن يقدم كابتشينو أحلى من كده بنفس
الأسعار.