The Definitive Guide to Living in the Capital , Cairo , Egypt

أكيد البنات هما اللى هـ يرتبطوا بالكلام أو المكان التالى، أول ما هـ نقول “فاشون تى فى” على طول هـ يصرخوا ويتنططوا، طيب يعملوا إيه بقى لما يعرفوا أن القناة الأشهر للموضة حول العالم واللى لها كافيه بنفس الاسم بقى له فرع فى مصر؟!.. أكيد البنات كلها على الأخص هـ تنط هناك.. بس العجيب أن كل ما نمر على الكافيه نلاقيه فاضي (يمكن ده حظنا).. السؤال هنا هل الكافيه بنفس رونق ومستوى القناة؟ هـ تعرفوا دلوقت من خلال زيارتنا.

قبل ما نقول تفاصيل زيارتنا لازم نعطيكم خلفية عن المكان، يعتبر “فاشون تي في كافيه” جزء من قناة الموضة الأكثر شعبية في العالم “فاشون تي في – Fashion TV” المتخصصة في بث عروض الموضة والأزياء إلى جانب برامج حياة العصرية والجمال على مدار 24 ساعة، تبث في 193 دولة، إلى جانب أكثر من 7 ملايين من الأماكن العامة اللى بـ تشمل الفنادق والمقاهي وبوتيكات الموضة والأزياء حول العالم. وترتبط القناة بعلاقات تعاون مع أكبر المصممين وأهم دور الأزياء على مستوى العالم.

عرفنا أن له فرع ثاني فى مصر فى داون تاون مول فى القطامية بس ما جاش لنا فرصة نروح نزوره، وعلى العكس مافيش معلومات على الفيسبوك أو الإنترنت غير الفرع ده، مافيش حاجة عن داندي مول.. ما علينا! ديكور المكان بـ يغلب عليه اللونين الأسود والذهبي وكنب قعداته رسمي أوى والمساحة مش كبيرة، وفيه ثلاجة عرض فيها حلويات وتارتات مختلفة.

أول ما رحنا ما كانش فيه حد فى استقبالنا، المكان فاضي، حتى شاشات التليفزيون اللى بـ تعرض المفروض عروض أزياء قناة F.tv بشكل مستمر مش شغالة، حسينا المكان ميت، بعد شوية جاء لنا الجرسون وأعطانا المنيو اللى ما كانتش أنيقة زي ديكور المكان، عبارة عن كرتون كبير محطوط عليه تصميم مطبوع، حتى أن نقاء الصورة مبكسل وشوية كلام كنا بـ نقرأه بالعافية.

أقسام المنيو عادية جدًا زي أى منيو، جئنا نطلب من الأطباق الرئيسية اعتذر لنا الجرسون أنهم موقفين القسم ده لأنهم بـ يعملوا تغيير للمنيو وهـ يطبعوا واحدة جديدة، ما عرفناش إيه العلاقة بس تقبلنا الوضع وطلبنا من قسم المقبلات طبق اسمه Antipasti وده حجمه صغير لشخصين (39.95 جنيه) فيه حلقات البصل المقلية وتشيكن ستربس وأصابع موتزاريلا وبطاطس ويدجز، ومن قسم الباستا أخذنا فارفايلى ألا سلامون (49.45 جنيه) وهي باستا بصوص أبيض مع السلامون، ومن السلاطات سلاطة سلامون مدخن بالأفوكادو (49.95 جنيه).

الأكل أخذ وقت شوية، المقبلات جاءت الأول بس بدل أصابع الموتزاريلا لقينا نازل كلوب ساندويتش بالسلامون، المقبلات كانت عادية جدًا وبعضها كان متحمر بزيادة وغامق، ما حسيناش أننا فى مكان مميز، حسينا أننا حمرنا شوية مقليات فى البيت، ما كانش فيها حاجة مميزة، وبعدين الباستا لما جاءت الصوص الأبيض كان حلو جدًا بس حسينا أن قطع السلامون منفصلة عن طعم الباستا، ما كانوش واخدين من طعم بعض، وبرضه ما حسيناش فيها حاجة مميزة، السلاطة اللى كانت أكثر حاجة محبطة، شوية جرجير معاهم شرائح أفوكادو وسلامون مدخن بصوص غالبًا الصويا، السلاطة كانت بـ تعوم فى الصوص ومزيج المكونات سوا كان طعمه غريب قفلنا منه، كلها حوادق مافيش حاجة تعطي طعم مسكر أو يعدل المزيج شوية، الصراحة ما كملناهاش.

بعد الأكل المحبط، قلنا نغير طعم فمنا ونطلب حاجة شرب، خاصة أن ثلاجة عرض الحلويات كان شكلها مغري، وقفنا واختارنا تارت موز بالكراميل (32.45 جنيه)، ومن المشروبات طلبنا كافيه لاتيه (17.95 جنيه) مع إضافة نكهة بندق (5.95 جنيه)، وسموزي خوخ باللبن (26.95 جنيه)، التارت ده من أخف التارتات اللى ذقناها فى حياتنا، شرائح موز من الداخل وتارت طري خفيف من بره مع كريمة أخف وصوص كراميل من فوق، اللاتيه كان لطيف وكميته كويسة، السموزي بقى برنس القعدة كلها، لو نطول نعرف بـ يتعمل إزاى هـ نعمله فى البيت كل يوم، لو نطول نعرف بـ يتعمل إزاى هـ نعمله فى البيت كل يوم، Syrup خوخ مع لبن وثلج مجروش فقوامه رائع وطعمه أروع، ما كناش عاوزينه يخلص.. بجد.

قعدتنا فى فاشون تى فى كافيه كانت محبطة، يمكن لما نذوق الأطباق الرئيسية يتغير رأينا، لكن الانطباع اللى واصل لنا لحد دلوقت أن الأحسن المكان ده يكون كافيه بـ يقدم مشروبات وعصائر وحلويات ويبعد عن الباقى.. نعتقد ده الأفضل لحد دلوقت إلى أن يثبت العكس.