The Definitive Guide to Living in the Capital , Cairo , Egypt

بقت أشهر سلسلة محلات مخبوزات القرفة بفروعها اللي في كل حي في القاهرة
والمحافظات كمان، ومفيش مانع ان الواحد يبوظ الدايت بتاعه عشان خاطر قطعة او إتنين
من «سينابون – Cinnabon »، اللي بجد يستاهل.

فتح في مصر سنة 2004 وإنتشرت فروعه في كل المناطق وجوة المولات وبعض فروع «مترو
ماركت»، السلسلة أصلاً أمريكية وبقى ليها حقوق إمتياز في مصر، من ساعتها الريحة
المميزة للقرفة اللي لايمكن تتوه عنها بقت مالية شوارع القاهرة. الفرع اللي روحناه
فيه مكان صغير للجلوس بس مريح، لكن بوجه عام هو أكتر للتيك آواي خاصة أن أكل
السينابون بـ يكون فيه تلزيق وزروَطة فـ الأفضل أنه يتاكل في البيت.

المنيو فيه إختيارات كتير والطعم الواحد للفطيرة له حجمين صغير وكبير،
السينابون كلاسيك بـ 15 جنيه وده الحجم الأكبر وممكن تكفي فردين، بـ تبقى لفائف لا
نهائية من خبيز طازة محشية بالقرفة والسكر ومتغطية بالجبنة الكريمة السايحة، والنتيجة
فطيرة معسِّلة وتجنن أي حد صغير أو كبير وهـ تديك طاقة غير عادية من كتُر السكريات
اللي فيها.

القطعة الأهم واللي شعبيتها عالمية في منيو «سينابون» هي الـ«شوكوبون – Chocobon » اللي سعرها 18 جنيه، محشية شيكولاتة وعليها من فوق
شيكولاتة٬ من الآخر غرقانة في الشيكولاتة، وعشان مسكّرة جداً مش اي حد هـ يقدريستحمل
كل السكر ده، لو كده ممكن تغير الإضافات زي الكراميل أو الجبنة الكريمة عشان تقلل
السكر.

وغير المخبوزات اللي بتـ تعمل قدامك فوراً، «سينابون» كمان بـ يعمل وجبات
فطار وأكلات سريعة وسلاطات وسندوتشات، بس للأسف الإختيارات في الحاجات دي محدودة
وقليلة، وفيه كمان كوكتيلات و«سموزيز – Smoothies » (ودي عصاير بقطع ثلج
صغيرة) وقهوة وموكا واسعارها بـ تبتدي من 15 جنيه.

لو كنتم مجموعة عددها كبير ممكن تجيبوا فطيرة حجمها كبير قد 9 حبات «ميني
بون – Minibon » اللي هو الحجم الصغير
من الكلاسيك سينابون، وممكن توفر 20 جنيه لو جبت 4 فطاير من الحجم الكبير ده اللي
قد 9 قطع «ميني بون».

إنك تحافظ على الدايت دي حاجة أصلاً صعبة، بس مع وجود محل زي «سينابون»
المهمة هـ تبقى مستحيلة، عشان كده بـ نقول الإعتدال كويس ولو من وقت للتاني روحت
وكلت واحدة «سينابون» عالماشي مفيش مشكلة، وإستمتع بأحلى طعم للفائف القرفة
المعسِّلة في العالم.