The Definitive Guide to Living in the Capital , Cairo , Egypt

محلات
العصير مالية شوارع مصر وخاصة القاهرة، طبعًا فيه محلات أحسن من غيرها. وفيه
مجموعة ممكن نعتبرها هي الأفضل على الأطلاق ولازم كل الناس تجربها. وإحنا كمان بـ
نتكلم عن محلات العصائر الطازجة والكوكتيلات المبتكرة مش بس محلات عصير القصب
الشعبية العادية.

كانت مفاجأة ظريفة للناس اللي عايشة أو بـ
تحب تتمشى في الدقي وشارع التحرير لما لقوا فرع «سيتي درينك» الجديد في منطقتهم. متمكنين
في كل المشروبات الباردة والكوكتيلات ومفتوح 24 ساعة، بأنوار بيضاء مبهرة وأولاد
بـ يوصلوا الطلبات للعربيات واقفين أمام المحل.

العصائر
والميلك شيك بـ يقدم في أكواب زجاج أو بلاستيك للتيك آواي والأحجام
الموجودة في كل محلات العصائر، والطلب هـ ييجي لك بسرعة أكيد لأن فيه 4 أو 5 أولاد
واقفين بشكل دائم أمام المحل بـ يوصلوا الطلبات بسرعة البرق. طبعًا فيه فواكة
طبيعية زي الفراولة والجوافة والموز، الحجم الصغير بـ 3 جنيه، والكبير بـ 4 جنيه.
والميلك شيك بالشوكولاتة والفانيليا والفراولة بـ 4 جنيه الحجم الصغير و 5 جنيه
للكبير. 

فيه
مشروبات كثير خاصة بالمكان ومنيو كامل للكوكتيلات اللي فيها مانجو أو قطع مانجو،
بأسعار من 3 جنيه لـ 7 و10 جنيه.ميلك شيك بثمرة الأفوكادو كان منعش ولذيذ، وطعمه
كان شبه ميلك شيك الفانيليا لكن بمذاق طبيعي أكثر.

من
مشروباتنا المفضلة في «سيتي درينك» مشروب اسمه الشبح، كوكتيل من البلح والتفاح
والكيوي واللبن (6 جنيه) ومشروب ثاني اسمه فياجرا وده فيه بلح وعسل ولبن وآيس كريم
وموز وزبادي وده بنفس السعر. مشروب ثالث من تخصصات المكان اسمه ماكس فيه جرجير وكيوي
وأفوكادو وعسل بنفس السعر برضه.

لو
مش مهتم قوي بموضوع السعرات والسكر الزيادة في الأكل والشرب يبقى عليك وعلى الميلك
شيك ببسكويت بوريو (10 جنيه).

فيه
بقى عصير لب وفستق وبندق وكاجو وبـ يبقى مخلوط باللبن برضه. اللب باللبن بـ 4 و5
جنيه، وطعمه بـ يبقى شبه حبة اللبن اللي بـ يفضلوا في آخر طبق الكورن فليكس
بالعسل! الفستق بـ 7.5 و8.5 جنيه وكان ثقيل قوي لكن طعمه خطير ويظبط الدماغ على
طول.