The Definitive Guide to Living in the Capital , Cairo , Egypt

في شارع اللاسلكي في المعادي الجديدة وقريب من مجموعة المطاعم اللي على
تقاطع الشارع مع شارع النصر هـ تلاقي محل حلويات صغير الحجم مكتوب عليه بالأحمر Sweet
Corner. يمكن المحل معروف لسكان المعادي
الجديدة والمناطق القريبة. لكن الاسم مش رنان زي «لابوار» و«قويدر» و«لو كرنفال»
رغم أن بتجرتنا المستوى ممكن يكون متقارب وكمان الأسعار متقاربة.

«سويت كورنر» متخصص أكثر في الحلويات الغربية والتورتات والجاتوه لكن عنده
حلويات شرقية وأطباق بسبوسة وكنافة وبعض المخبوزات زي الكرواسون والبسكويت. وفيه
مملحات زي الساليزون والميني كلوب ساندويتش والقراقيش بالجبنة. لكن اللي كان
مفاجأة بالنسبة لنا أنه بـ يعمل Catering وتجهيز حفلات وبوفيهات كاملة، وممكن تتفق
على كل حاجة معاهم ونوع الخدمة أو السرفيس في المناسبات وتدفع عربون وتأكدنا من
العاملين بالمكان أنهم محترفين وهـ ينفذوا تفاصيل الاتفاق على أكمل وجه.

التورتات شكلها كان جميل في ثلاجات العرض، الحجم الوسط بأسعار من 120 لـ
150 جنيه، وممكن تعمل التصميم أو الرسم اللي أنت عاوزه على وجه التورتة طبعًا. فيه
جاتوه سواريه بالكيلو (100 جنيه) وقطعة الجاتوه العادي بـ 7 جنيه والدستة بـ 70
جنيه. فيه كلير بالشوكولاتة وتشيز كيك بالفراولة والتوت (10 جنيه) وطبق الحلويات
الشرقي بـ 100 جنيه وده أكثر من الكيلو بشوية. وفيه بلح الشام وكنافة وبسبوسة
وبقلاوة وكل الأصناف معمولة بسمن بلدي والطعم كان مثالي والسكر مضبوط.

جربنا قطعة جاتوة Dark Chocolate وقطعة ترايفل بالتوت وكان طعمهم حلو وخفيف مش
دسم قوي وسكرهم إلى حد ما قليل بس ده كان كويس علشان نستطعم الكيك وحبات التوت
نفسها. طبق الميني كلوب ساندويتش النصف كيلو بـ 45 جنيه والحشو كان فريش والعيش
نفسه فريش ودي أهم حاجة. وجربنا قطعة تشيز كيك بالتوت وكانت مفاجأة في طعمها
بالنسبة لسعرها، كانت لذيذة والجبنة مضبوطة مش كثيرة ولا قليلة، بس كان ناقصها أي
نوع من الصوص يتحط عليها.

منيو الـ Catering الأسعار فيه
كالتالي: الخروف مع الأرز أو الفتة بـ 1500 جنيه، والديك الرومي  بـ 600 جنيه وسرفيس الدجاج أو الكانيلوني أو
البيكاتا أو الفتة أو المقلوبة أو الكفتة المشوية أو الشيش طاووق بأسعار من 200 لـ
400 جنيه وفيه تسوية بس للديك أو الخروف بـ 200 و 250 جنيه. فيه سرفيس جمبري
وسلامون مدخن وسمك بالمايونيز بـ 500 جنيه. والمحاشي والمقبلات بـ 120 جنيه. كل
الأسعار دي لسرفيس أو كميات تكفي 20 شخص، والاتفاق معهم يفضل يكون قبل الميعاد
بيوم على الأقل. طبعًا إحنا ما جربناش أي حاجة من الأكلات دي عندهم، بس اللي ناوي
يعمل بوفيه من عندهم ممكن يطلب عينات أو يروح المطبخ بتاعهم ويشوف الأكل بنفسه.

في رمضان «سويت كورنر» بـ يعمل حلويات مخصوص للشهر الكريم زي صينية الكنافة
بالمانجو والبسبوسة بالكريمة والمكسرات وقطائف وبغاشة. ونوعدكم في رمضان نجرب لكم
أصناف مبتكرة من عندهم ونرشح لكم أفضلها. إنما النهاردة نقدر نأكد لكم أن التورتة
والجاتوة حلوين قوي عند «سويت كورنر» ولو عندك مناسبة وكنت قريب من المعادي
الجديدة ما تفكرش مرتين قبل ما تجيب لوازم الاحتفال أو أي حلويات من هناك.