The Definitive Guide to Living in the Capital , Cairo , Egypt

في شارع الحجاز وقبل مستشفى هليوبوليس بكام عمارة على
نفس الصف موجود مطعم وكافيه «سكوير – Square»
بعلامته المميزة باللون البرتقالي، المدخل صغير ما يوحيش أن المكان واسع من الداخل
ومتقسم لجزئين واحد مفتوح وده مخصص للمدخنين والشيشة، وجزء داخلي مغلق لغير
المدخنين.

الإضاءة الهادئة للمكان بـ تجبرك أنك تكون هادئ وصوتك
واطي، بالذات في المساحة الخارجية المفتوحة اللي اختارنا نقعد فيها علشان الجزء
الداخلي كان فيه عيد ميلاد وكان دوشة. الديكور شيك والكراسي مريحة من اللي لما تيجي
تقعد تغطس فيها، لكن ده عيبها في نفس الوقت لأن ساعة الأكل بـ تبقى تقريبًا مش
طايل الترابيزة. فيه مجموعة من التابلوهات لوجوه بنات (موديلز) على كل جدران
المكان وموسيقى البوب طالعة من اللامكان والشاشات بـ تعرض كليبات أغاني من غير
صوت، وشجيرات وزرع أخضر حواليك، من الآخر القعدة بره ظريفة جدًا.

المنيو كبير وممكن تضيع وقت كثير وأنت مش عارف تختار
إيه، مشهيات وسلاطات وباستا بكل الأنواع، لكن نسهل عليك المهمة شوية ونقولك لو عاوز
تأكل ادخل على صفحة الأطباق الرئيسية وبلاش الساندويتشات، مش علشان الساندويتشات
وحشة ولا حاجة ولكن علشان الفيليه والستيك وأطباق الدجاج والأسماك مالهاش حل. بدأنا
الأول بطبق مشهيات من الجمبري المقرمش بالخلطة «Crispy Shrimps» بـ 35 جنيه ومعاه صوص مايونيز
بقطع الخضروات، وده ينفع وجبة لوحده لأن الكمية كانت وفيرة والجمبري كان كبير.
طلبنا فيليه اللحم البقري بصوص العنب الأحمر أو النبيذ من غير كحول زي ما مكتوب في
المنيو، سعره 69 جنيه، وتختار معاه صنفين جانبيين من البيوريه أو الأرز البسمتي أو
البطاطس المحمرة أو السوتيه، وجربنا كمان طبق الدجاج بالتركي المدخن وصوص الباربكيو
(60 جنيه) وده رشحه لنا الجرسون دونًا عن باقي أطباق الدجاج زي الفاهيتا ودجاج
المشروم ودجاج (بيبي فيردي) المشوي. الفيليه كان عظيم، مع صوص العنب الأحمر اللي
أعطاه مزازة غريبة لكن لذيذة، السوتيه خرافي، كان ناقصه بس بروكلي علشان إحنا بـ
نحبه، جربنا مع الطبقين الرئيسيين كل الأصناف الجانبية: الأرز والبطاطس المحمرة
والبيوريه وكلها مافيهاش غلطة. والدجاج بلحم الرومي المدخن كان لذيذ وكان عليه
خلطة أعشاب خاصة بالمكان ميزنا فيها طعم الروزماري والريحان.

الميزة الحقيقية في أكل «سكوير» واللي مش موجودة في
مطابخ كثير أن الأكل خفيف جدًا ومافيهوش أي دهون، وهـ تخلص وجبتك الكاملة وهـ تشبع
وهـ تفضل حاسس أنك خفيف وقادر تتحرك مش أنتخت وعايز تنام زي ما بـ تخلص أكل أي
وجبة دسمة. لكن طبعًا علشان إحنا صعب علينا نقوم خفاف كده وبحيوية قعدنا نتفرج على
منيو الحلويات والآيس كريم وقررنا أننا لازم ندفع الحساب وإحنا مش قادرين نتنفس
خلاص، وطلبنا كريب بالفواكة وكريمة الباستري اللي زي المهلبية (33 جنيه) وجاء لنا
ساخن وعليه بولة آيس كريم سايحة وحاجة آخر بهدلة! ده طبعًا كان كفيل أننا نقوم مش
شايفين أمامنا لأنه وجبة في حد ذاته وما قدرناش نخلصه رغم أنه كان حلو قوي وسكره
مظبوط.

«سكوير» من الأماكن القليلة في كايرو اللي بـ تقدم “شيري
كولا” وبـ يعملوه بجودة عالية جدًا وسعره معقول (12 جنيه)، ده غير تشكيلة
كبيرة من المشروبات الساخنة والكوكتيلات والعصائر والميلك شيك والسموزي وكلها
بأسعار من 15 لـ 25 جنيه. ومنيو الحلويات فيه تشيز كيك وبراونيز وآيس كريم بأسعار
من 25 لـ 30 جنيه.

الخدمة جيدة جدًا وسريعة وفيه عناية ملحوظة بالنظافة
وخصوصًا في الحمامات، «سكوير» مكان ظريف للأكل والشيشة وخروجة جماعية مع أصحابك،
أو حتى قعدة رومانسية في الويك إند.