The Definitive Guide to Living in the Capital , Cairo , Egypt

رنا شرف

إحنا من عشاق القهوة، بأشكالها وأنواعها المختلفة، لأننا مؤمنين أنه مافيش زي كوباية قهوة ومعاها حاجة حلوة زي المولتون كيك أو التشيز كيك أو تراميسو، ويا سلام لو معاهم سندوتش تركي مدخن او جبن مثلًا، ياه حاجة عظمة، والعظمة هتكمل لو كل اللي فات ده متوفر بجودة عالية في مكان واحد.

اعرفوا تفاصيل تجربتنا في ستريلا كافيه الدقي.

أول ما هتدخل “ستريلا” هتحس براحة نفسية، المكان بسيط وصغير واللون الأخضر مسيطر علي الديكور هناك، وفيه لوحات فنية جميلة على الحوائط.

المكان فيه ثلاجة فيها سندوتشات وحاجات حلوة، بتختار منها اللي أنت عاوزه، يعني تقدر تفطر في المكان أو تكون وجبة سريعة تسندك باقي اليوم، أو حتى تختار بس حاجة حلوة زي التشيز كيك مثلُا.

نيجي بقى لتجربتنا في المكان.

طلبنا فرابتشينو كراميل عليه فلفر فانيلا، وده كان سعره 90 جنيه، كان طعمه حلو ومعمول صح والفلفر مديه سكة تانية خالص.

وبما أن الحلو عندهم متنوع، حسينا بحيرة، لحد ما قررنا نختار كرواسون بالبستشيوه وكان أكتر من رائع وفريش وسخن، وطعمه حكاية، وده سعره 80 جنيه.

في المجمل تجربتنا في المكان كانت إيجابية، وأكيد هنجرب ستريلا كوفي تاني، يكفي أنه مكان مصري وقادر ينافس كافيهات عالمية في القاهرة.