The Definitive Guide to Living in the Capital , Cairo , Egypt

سلسلة ستاربكس – Starbucks غنية عن التعريف، مش محتاجين نكتب عنها نبذة في مقدمة الموضوع لأن فروعها المنتشرة في كل مكان في العاصمة دليل كبير على نجاحهم، وآخر الفروع دي كان في ويست تاون هب في الشيخ زايد.

موجود في ويست تاون هب في المنطقة اللي بره قبل ما تدخل من المدخل الرئيسي، على طول زحمة خاصة بالليل لأن المكان فيه إضاءة شكلها حلو أوي، بس إحنا حبينا نعيش التجربة مع الفطار الصبح وقد كان.

النظام في ستاربكس -زي ما البعض عارفين- هو أنك بـ تروح الكاونتر تطلب بنفسك، زي في "كوفي بين أند تي ليف – Coffee Bean & Tea Leaf" كده، الصبح كان طوابير لأن الناس بـ تشتري القهوة بتاعتها وهي رايحة على الشغل Takeaway، طلبنا نكهة جديدة كانوا حاطين إعلان عنها وهي توفي نات لاتيه (26 جنيه الحجم الصغير)، ومن المخبوزات والساندويتشات المعروضة اختارنا ساندوتش حلومي معمول على الطريقة العربية (33 جنيه) وكرواسون بالجبنة (14 جنيه)، والحلو دوبل تشوكليت مافن (22 جنيه).

نكهة التوفي نات الجديدة وهمية، ومش هـ تحتاج تحط سكر زيادة عليها لأن السكر اللي في التوفي كفاية، ولك اختيار أنك تحط عليها كريمة مخفوقة ولا لأ، نعتقد دي بقيت نكهة اللاتيه المفضلة لنا دلوقت، ساندويتش الجبنة الحلومي كان رائع برضه (كل الساندوتشات والمخبوزات بـ يتم تسخينها قبل التقديم)، مكون من شرائح جبنة حلومي مشوية ومعاها طماطم مجففة وريحان، كانت فريش والمكونات طعمها متناسق سوا، الكرواسون بالجبنة الرومي برضه كان فريش وهش وحلو.

بعد شوية أخذنا عصاير فريش قبل ما نمشي، ودي بـ تكون موجودة في ثلاجة مكتوب عليها "للعرض فقط"، رغم أن الجرسون جاب لنا منها العصائر، مش فاهمين إزاي للعرض بس، المهم أخذنا عصير برتقال (15 جنيه) وده بـ يكون في زجاجة فيها عصير باسم ستاربكس معصور فريش مخصوص لهم وكان منعش جدًا وطعمه حلو أوي لدرجة شكينا أنهم ضايفين حاجة عليه، وكمان أخذنا فروت سلاد (22 جنيه) فيها فواكة مختلفة زي التفاح والأناناس والكنتالوب، الفاكهة كلها فريش والعصير اللى هي فيه كان سكره مضبوط وخفيف.

تجربة الفطار -خاصة لو القعدة في الشمس بره- وهمية في ستاربكس، أو حتى لو هـ تاخد قهوتك Takeaway، لو أنت من سكان بيفرلي هيلز أو الشيخ زايد عامة، المكان ده لازم يكون في قائمتك لفطار خفيف وقهوة حلوة.