The Definitive Guide to Living in the Capital , Cairo , Egypt

موجود في شارع جانبي هادئ متفرع من شارع الطيران في مدينة نصر هو شارع عبد الفتاح اسماعيل، قريب من كافيه ومطعم عم جمبري الشهير في نفس المنطقة، هو كافيه «سامبا» اللي زرناه في وقت متأخر بهدف تقضية ساعتين قبل آذان الفجر وتناول وجبة سحور لذيذة بعد ما رشحه لنا أحد الأصدقاء.

الكافيه فيه مساحة خارجية للجلوس أقرب للمقاهي البلدي التقليدية وفيه مكان داخلي هادئ شوية. الفرق بينه وبين أي مقهى هو أنه بـ يقدم أكلات وحلويات مش بس مشروبات، والمنيو بتاعه فيه أطباق لحوم ودجاج وبيتزا وباستا وفيه مقبلات وحلويات شرقية وغربية وشيشة طبعًا.

أخذنا مكاننا في ركن ظريف خارج المحل أمام شاشة بروجيكتور عملاقة وسألنا أول حاجة عن السحور، وعرفنا أنهم عاملين منيو مخصوص للسحور فيه فول وبيض وجبن، بس حسينا أن الأسعار غالية ومش منطقية على أكلات زي دي، فقررنا نجرب المنيو العادي وأهو منه سحور ومنه نعرف مستوى مطبخ المكان بشكل عام. طلبنا بيتزا سامبا اللي هي ميكس بين البيف وقطع الدجاج والببيروني والجبن (29 جنيه) وهي مشبعة جدًا لفرد واحد مهما كان جعان، وطلبنا معاها طبق جريك سلاد أو سلاطة يوناني بالخضار والجبن الأبيض والزيتون (13 جنيه). الطلب تأخر شوية وكنا على أعصابنا لأن وقت آذان الفجر كان بـ يقرب، لكن أخيرًا جابوا الطلبات بعد ما كنا شربنا كوباية شاي أخضر مضبوطة (7 جنيه) وبدأنا نستمتع بالبيتزا اللي كانت اختيار موفق جدًا لأنها معمولة بحرفنة ومليانة إضافات فريش. السلاطة مش حلوة قوي وحسينا أنها بدائية بزيادة، مجرد خليط من الخضروات وقطع جبنة فيتا من غير التوابل وزيت الزيتون اللازم.

تجربة السحور هنا كانت حلوة لأنها كانت بعيدة عن أي مظهر من مظاهر التزاحم والانتظار لآخر لحظة وتبقى مش لاقي مكان تقعد ولا لاقي حد تطلب منه، كله في الروقان وهدوء الأعصاب وممكن تطلب بعد أي وجبة مشروبك المفضل ساخن أو بارد أو حتى زبادي علشان تهضم، في رأينا أنت من وقت للثاني بـ تبقى محتاج مكان زي ده لأكلة خفيفة ودردشة وحجرين شيشة (6 جنيه) لو كنت مدخن وترمي رأسك للوراء وتستعيد ذكرياتك أو تراجع أحداث يومك، شكرًا «سامبا» على الليلة البسيطة الجميلة.