The Definitive Guide to Living in the Capital , Cairo , Egypt

في شارع 270 بالمعادي هـ تلاقي كافيه
ومطعم اسمه «ساليموز- Salimos»،
المكان ده مختلف شوية عن باقي الأماكن، هـ تحس فيه بالراحة والاسترخاء بجد وكمان أول
ما تروحه هـ تلاقي أماكن للركنات.

أول ما تدخل هـ تلاقي الجرسونات بـ
يرحبوا بك جدًا و هـ تلاقي المكان مقسم لجزئين وأحسن جزء فيهم المكان المفتوح، هـ
تلاقي الديكور مش تقليدي خالص وفيه زرع كثير، والمكان المقفول برضه هـ يعجبك لأنه
هادئ جدًا والإضاءة كمان هادئة و هـ تلاقي اللوجو بتاع المكان موجود على كل حاجة يعني
هـ تحس أنك في مكان شيك وقيم.

أول ما تفتح المنيو هـ تلاقي حاجة
غريبة قوي، هـ تلاقي أول صفحة مكتوب فيها كل حاجة بـ تأخذ وقت أد إيه فى التحضير، يعني
مثلاً هـ تلاقي البيتزا بـ تأخذ 18 دقيقة، والباستا 15 دقيقة، والمشويات 25 دقيقة،
وطبعًا ده هـ يخليك تعرف هـ تنتظر قد إيه وده مش موجود في أي مكان.

جودة الأكل بصراحة رائعة وكمان
الكميات والأحجام معقولة جدًا، كمان تقدر تختار ما بين كذا مذاق، هـ تلاقي أنواع أكل
أسباني، إيطالي، فرنساوي، مغربي، تركي، لبناني، يعني هـ تستمتع بكذا مذاق
وكذا اختيار للأكل.

لعشاق السلاطات، هناك فيه أنواع
رائعة للسلاطة، ونوع جديد اسمه «سلاطة مارسيلي –Marseli Salad »، ودي سلاطة مكونة من صدور فراخ
متبلة مع الخس المخلل والجبن الشيدر ودي أحلى أنواع السلاطات هناك. وكمان البيتزا رائعة وأحسن
نوع هو البيتزا بالجمبري والفراخ.

الخدمة هناك سريعة قوي وفي نفس
الوقت جيدة جدًا يعني لو طلبت حاجة بتيجي بسرعة وكمان الجرسونات بـ يكونوا قريبين
منك.

بالنسبة للأسعار متفاوتة مش رخيصة
قوي ولا غالية قوي، يعني متوسطة. هـ تسمع هناك موسيقى وأغاني متنوعة وكمان الديكور
يحسسك بالاسترخاء وسرعة الإنترنت عالية.