The Definitive Guide to Living in the Capital , Cairo , Egypt

القاهرة مليانة مطاعم وكافيهات، ومولات العاصمة المصرية مش بس للتوسق، دي فيها أماكن كتير للأكل والمشروبات وسط محلات اللبس والإلكترونيات وغيرها، لكن مش كلها حلوة، يمكن لأن قعدتها بتكون رسمية. لكن الحقيقة قعدتنا في ذا جاردن كافيه كانت مختلفة، حبينا المكان، الخدمة، وجودة الأكل رغم إن المشروب اللي طلبناه مع الأكل ماكنش أفضل حاجة.

اسمحوا لنا نعرفكم أكتر على تفاصيل قعدتنا في ذا جاردن كافيه سيتي ستارز.

إحنا بنحب الأماكن المريحة في قعدتها، المبهجة في تفاصيل ديكوراتها، اللي ممكن نقعد فيها وقت طويل من غير ما نحس بزهق أو ملل.

كنا في سيتي ستارز بنتفرج على المحلات، لما حسينا بالجوع قررنا ندور على مطعم كويس، والحقيقة المكان فيه عدد مش قليل من المطاعم والكافيهات، لكن حسينا إن أغلبها رسمي قوي في تفاصيله. لحد ما عنينا وقعت على ذا جاردن كافيه.

المكان ديكوراته بسيطة، وقعدته مريحة، والموظفين هناك أسلوبهم راقي جدًا وتحس إنهم بيتعاملوا معاك بحب.

أكتر حاجة عجبتنا هي إن المكان مش مطعم عادي، دي مساحة مفتوحة وسط المول الضخم، يعني وأنت قاعد الناس بتعدي من حواليك، فلو كنت بتحب التركيز في التفاصيل ووشوش الناس هتحب التجربة جدًا. فكرة إنك بين الناس دي بتكون حلوة خصوصًا لو الناس دي لطيفة ومش متطفلة.

بالنسبة للأكل، طلبنا في البداية فرايد موتزاريلا، ودي بينزل معاها بطاطس، الطبق كان جميل، وعجبتنا كل تفاصيله، والبطاطس كمان كانت مقرمشة من برة وطرية من جوة، يعني معمولة زي ما الكتاب بيقول. الموتزاريلا كانت كميتها كبيرة في الطبق، استمتنعنا جدًا بالطبق اللي سعره 88 جنيه.

طلبنا كمان ساندوتش تحفة اسمه لويزيانا تشيكن ساندوتش، وده عبارة عن شرائح فراخ، حقيقي الفراخ معمولة صح، والعيش طعمه جميل، والساندوتش حجمه كبير وبينزل نصفين، يعني هو أقرب لوجبة كاملة هتشبعك بجد. وده سعره 125 جنيه.

طلبنا كمان مشروب من ترشيح الموظفة، وهو جرين آبل مينت فريسكا، والحقيقة إن الطعم كان من أسوأ ما يمكن، أقرب لطعم الأدوية، وطبعًا ماقدرناش نشربه.

بصفة عامة حبينا المكان، وأكيد هنجرب التجربة مرة تانية لما نكون هناك.. في سيتي ستارز مدينة نصر.