The Definitive Guide to Living in the Capital , Cairo , Egypt

كعادتنا كل سنة لازم نرشح لكم أفضل مطاعم، أو كافيهات زرناها فى عام 2013، نشرنا لكم من كام يوم أفضل 10 مطاعم فى القاهرة، ودلوقت بـ نختم معاكم السنة بأفضل الكافيهات اللى زرناها.. المنافسة الشديدة، بس شوفوا معانا مين اللى احتفظ بمكانته ومين اللى دخل جديد على القائمة وبـ يوعد أهل كايرو بتجربة فريدة ومميزة.. 

ليتشي – Lychee 

شارع البرازيل الطويل والمزدحم فى الزمالك مشهور بالكافيهات والمحلات والمطاعم، “ليتشي” فتح السنة دي وتميز جدًا لأنه مش مكان تروح تشرب فيه مشروبات فريش وبس، لأ كمان سموزى مليان فيتامينات أو كوكتيلات مختلفة ما حدش قدمها قبل كده.. من الآخر هو بـ يقدم فكرة جديدة بـ تثبت أن العصير ممكن يبقى ممتع بنفس الدرجة.

الألوان في الديكور جامدة والمكان شكله قريب من ثمرة الليتشى الحقيقية بصدفتها الثابتة على الباب الخارجى اللى بـ تغلف فاكهة لذيذة من الداخل، مساحته صغيرة بس “جبار”، المنيو عندهم تفاعلية عبارة عن جهازين أى باد معلقين على الحائط تقدر تتفرج فيهم على المنيو، وتعمل السموزى الخاص بك وكمان تطلب عن طريق برنامج ليتشى الخاص قبل ما تدفع على الكاونتر، لازم تزوره.

نولا كب كيك – Nola Cupcake 

المكان اللى مش بـ يتحرك ولا بـ يتغير من قائمتنا لأفضل 10 كل سنة، السنة اللى فاتت كان على القائمة برضه، ومازال بـ يحتل مكانته وبـ يطوروا من نفسهم كمان، بعد فرع الزمالك وبعده المعادي فتح كمان فى هليوبوليس بالكوربة، أكيد هـ تلاقى عندهم نوع كب كيك مفضل لك، إحنا بـ نعشق اللى بزبدة الفول السودانى جدًا، ومافيش عيد ميلاد بـ يعدي لحد من فريق كايرو 360 إلا ونولا لازم تكون حاضرة معانا.. وبزبدة الفول السودانى كثير كمان.

ممكن تروح المكان تشترى بنفسك أو تطلب خدمة التوصيل اللى مش بـ تتأخر، نولا عندها حضور قوى فى القاهرة، وبـ تلتزم بإشباع عشق القاهريين للحلويات. كل الحلويات الخارجة من فرن نولا يميزها المذاق الرائع وواضح فيهم الابتكار.

سكوبس – Scoops 

برضه محل جديد من محلات الزبادى المثلج والآيس كريم فى القاهرة، سكوبس فتح فى أبراج نايل سيتى، فعلاً مكان لطيف، بـ يقدم آيس كريم إيطالى بحق وحقيقى وكمان زبادى مثلج لذيذ.

سكوبس بـ يقدم نوعين من الزبادى: طبيعى وبنكهات، كل الآيس كريم كان لذيذ، ويعتبر ابتكار أصلى، شد انتباهنا أصيص زرع ألوانه مبهجة مليان آيس كريم شوكولاتة، فراولة، فانيليا أو آيس كريم، عليه فتافيت شوكولاتة ووردة صناعية، عندهم كمان حاجة شكلها لطيف اسمها جيلاتو بوبس عبارة عن مصاصة من الآيس كريم.. بجد الآيس كريم عنده حاجة ثانية خالص.

تي سي بي واي – TCBY 

أفضل مكان للزبادي المثلج -من الآخر- فتح فرع جديد في الزمالك في كلوب 33 علشان ينضم لمجموعة أماكن تقديم الزبادي المثلج في القاهرة، سلسلة محلات عالمية تفتخر بمنتجات الألبان الصحية والعضوية الطازجة.

الزبادي بـ يأتي في طبقات متعددة من الشوكولاتة والفانيليا الذهبية والفراولة والكيوي وموس الشوكولاتة البيضاء والتارت التقليدي والبسكويت والكريمة، كل واحدة كان قوامها زي الكريمة وطازجة وطعمها زي ما اسمها بـ يقول، اللي خلانا محتارين نقرر، طاقم العمل ودود ونشيط، ومكونات طازجة وجودتها جيدة وتقدروا تتذوقوها بنفسكم هـ يكون ما بين أيديكم زبادي مثلج لذيذ، “تي سي بي واي” من الآخر فى المقدمة.

ولعة – Wel3a 

إحنا لسه فى الزمالك اللى أثبتت أنها موطن كل الأماكن الجامدة اللى فتحت فى 2013، بألوانه الزاهية واللامعة هـ يشدك وأنت ماشي فى شارع 26 يوليو، ولأنه نجح ولاقى إقبال كبير فتح فرع ثاني له بـ يطل على النيل برضه فى الزمالك على حافة مركب كلوب 33،

ولعة كوكتيل خليط طازج سميك من الخوخ، الكيوى والأناناس المسكر، كمان منيو الشيشة الخرافية فيها نكهات نخلة المحلية، وكمان نكهات مستوردة زى الفواكه الفاخرة وتبغ ستارباز. من الآخر للى بـ يدور على الجديد.

كاروسيل – Carousel 

موجود قريب من تيفولي دوم هليوبوليس، من المحلات القليلة اللي صورها على صفحة الفيسبوك تخليك عاوز تروح بنفسك وتتفرج وتذوق على الحقيقة، المحل بـ يعمل تورتات بالطلب بالتصميم اللي العميل عاوزه سواء هما اللي يعملوا التصميم أو أن العميل هو اللي يبقى مجهز التصميم وممكن كمان تختار من مجموعة تصميمات جاهزة عندهم وسعر كل تورتة بـ يختلف على حسب حجمها وتصميمها والخامات المستخدمة فيها.

المحل بـ يبيع كمان كب كيك بنكهات متنوعة، فيه كمان حاجات ثانية زي الكوكيز، والبراونيز، وكرات الشوكولاتة دي من أحسن الحاجات عندهم في المحل. عندهم خدمة توصيل مالهاش Minimum في هليوبوليس لكن مع ذلك المكان يستحق زيارة لأنه مكان مبهج ولطيف والحلويات والمخبوزات لذيذة.

دي. كابتشينو – D. Cappuccino 

“الكافيه الرسمي للروقان”.. ده الشعار اللى كاتبينه على المنيو وأماكن كثيرة فى الكافيه الموجود فى عباس العقاد بمدينة نصر، السمة الأساسية للمكان هو الخط والحروف العربية اللى مرسومة على الزجاج من الخارج وبالداخل، أول ما تدخل هـ تحس بجو مريح وهادئ، مش إحنا بس اللى رحناه وشكرنا فيه، لأ كمان الشيخ العريفي كتب عنه على تويتر وقت زيارته لمصر.

لأول مرة نروح مكان حلو من كل حاجة، المكان بـ يغلب عليه جو إسلامي مودرن (ودي حاجة أول مرة نلاقيها فى القاهرة)، بالخط العربي فى الديكورات، مزيكا وأغاني إسلامية باللغة الإنجليزية لماهر زين وغيره، المكان اللى بره مختلط وللعائلات، وفيه مكان ثاني ده مخصص للبنات فقط ومنفصل عن الثاني بزجاج شفاف، فيه رائحة بخور وعنبر وحاجات حلوة ثانية خلت قعدتنا مميزة، وجديدة علينا الصراحة.

الفيشاوي

قهوة القاهرة العظيمة اللى شهدت كتابة جزء كبير من روايات الأديب المصرى العالمى نجيب محفوظ الحاصلة على جائزة نوبل فى الأدب، عمرها ما هـ تفقد بريقها ولا تميزها وأنها مقصد لكل المصريين والأجانب، السنة دي مافيش طوابير انتظار زى زمان، ولا حتى الزحمة اللى ممكن تعمل مشاكل للى بـ يتضايقوا من الأماكن المقفولة.

مكانها فى شارع ضيق فى سوق خان الخليلى المزدحم، وشكل القهوة الشهيرة روعة بالمشربية الخشب الغامقة والحوائط بلونها الأصفر المأكسد. شاى بالنعناع برائحته العطرية الجميلة بـ يُقدم فى أبريق شاى أزرق غامق محطوط على صوانى ذهبية كبيرة ويصب فى كوبايات زجاج مزخرفة، وفى نفس الوقت مُعلق نجف ومرايات مبروزة بالخشب؛ الموضوع كله عبارة عن كرنفال مبهج خصوصًا للمصورين ومحبى الجمال، الباعة المتجولين دائمًا حولك، بـ يبيعوا كل حاجة بداية من السبح لغاية سلاسل زرقاء وبـ يلفوا على القاعدين خارج القهوة فى الممر الهادئ ببلاطه المميز.

روزانا – Rozzana 

في القاهرة الجديدة قريب من 7 Stars مول ومارينا مول، فيه منطقة للعب الأطفال بباب مستقل، شكل المكان لطيف ومعتنى به جدًا، فيه كرم ضيافة ومستوى الخدمة راقي.

روزانا أقرب لكافيه منه لمطعم، ومع ذلك المنيو بتاعه متنوع وفيه أطباق عالمية ومعجنات وساندويتشات ومقبلات وسلاطات، لازم تجرب هنا رول الدجاج الفرنسي المحشو بالأرز وجبن البارميزان الغرقانة في كريمة دسمة من الجبن والأعشاب وبـ يُقدم معاها أرز برضه بالخضروات والذرة الحلوة، إيه الحلاوة دي! الضيافة هنا مهارة! لسكان التجمع الخامس بـ نرشح لكم المكان كنقطة تجمع جديدة وأنيقة غير الداون تاون والميتنج بوينت.

كارلوس كافيه & ريستوران – Carlo’s Café & Restaurant 

أصله من إسكندرية، من بدايته سنة 2006، بدأت سلسلة كارلوس كمكان خاص يتبع أقصى درجات الجودة اللى ممكن تشوفها فى أى كافيه. مع خمسة أماكن مميزين فى الإسكندرية، كارلوس وصل القاهرة مع فرع جديد فى منطقة هليوبوليس الراقية بميدان ألماظة، وكمان مع خدمته الجيدة والأكل الأحلى، كارلوس قدر يثبت نفسه كواحد من أجمد الكافيهات فى واحدة من أكثر مناطق المدينة شهرة.

جو كارلوس يبعث إحساس بالحداثة وسط شارع مليان فروع مطاعم وكافيهات من كل أنحاء العالم. الديكورات أنيقة ومميزة بمزيكا مزيج لطيف من الجاز، والسوينج والشرقي، وفيه بلكونة واسعة يقدر فيها زوار الكافيه الاستمتاع بالمنظر الجميل للشارع، جرب عندهم الفوندو اللى من شوكولاتة بلجيكى غنية ولذيذة بشكل لا يقاوم، مع شرائح من الموز والتفاح، وكمان ويفر مارشميلو وشوكولاتة، وكل صوص منهم كان أجمل من اللى قبله.

كل سنة وأنتم سعداء وطيبين!