The Definitive Guide to Living in the Capital , Cairo , Egypt

جاكومبي جروبي هو صانع حلويات سويسري وصل مصر في القرن الـ18 بعد ما سمع عن الانفتاح والنمو الاقتصادي الكبير، واشتغل عند أقاربه من عائلة جيانو، وهو في سن 26 سنة وبالتحديد سنة 1890 اشترى أول محل له في الإسكندرية، وبعدها بدء يفتح سلسلة “جروبي” الشهيرة، ولكن حنينه لبلده رجعه لها بثروة كبيرة بعد ما باع أشهر محل حلويات في الإسكندرية وقتها، لكن في سويسرا خسر كل فلوسه، فقرر جاكومبي يرجع مصر تاني، ويبدأ يفتح سلسلة جروبي من جديد في القاهرة سنة 1902، ونجحت جدًا، وعلشان كده إحنا قررنا نروج حديقة جروبي في شارع عبد الخالق ثروت، اللي ليها مدخل في شارع عدلي.

في السطور الجاية هننقل لكم تجربتنا في المكان الجميل ده.

المحل موجود بديكوراته القديمة، اللي طاغي عليها اللون البني، وفيه قعدة داخلية مكيفة وخارجية في الهواء الطلق، ودي اللي إحنا حبينا نقعد فيها، وحاليًا هما في مرحلة تجديد وتطوير للحديقة، وحسب ما عرفنا إنهم مش هيقربوا من الشكل الرئيسي للمحل الأصلي وهيبقى على وضعه، علشان يكون موجود عبق الماضي، والجنينة تبقى بروح العصر، وأكتر حاجة لفتت نظرنا في المكان أنهم بيعملوا نافورة في المدخل، ومفروش كله زلط، وهما مستمرين في التطوير، وسط الموسيقى المختلفة والقعدة الهادية رغم زحمة المكان.

الخدمة في جروبي مستواها عالي، وهتلاقي الشباب هناك بيتعامل بحرفية كبيرة ومنتشرين بشكل واضح، والبار بتاع المشروبات مكشوف قدامك، وجنبه ثلاجة الآيس كريم، وطبعًا علشان جروبي هو اللي دخل الآيس كريم مصر.

قررنا أول حاجة نجرب الآيس كريم، واللي كان بـ 40 جنيه، وصحيح طعمه مش زي زمان، لكن يفضل الآيس كريم في جروبي هو واحد من أهم المثلجات اللي بتتباع في مصر، وطعم الفراولة والفانيليا والكنتلوب كأنك بتاكلهم طازة.

كمان جربنا مشروب ليمون ونعناع بـ28 جنيه، وده بقى معمول بنعناع بلدي ومش مر، وطعمه بيمزكك، وماتنسوش تقولوا لهم على كمية السكر اللي بتحتاجوها علشان هما بيعملوه بسكر قليل للحفاظ على الصحة.

كمان جربنا القهوة في المكان، واللي ثمنها 22 جنيه، ولكن هي كانت عادية ومش مميزة ومحتاجين أنهم يحسنوا نوعية البن وده هيفرق كتير.

المكان بيقدم كمان كيك وتورت وأكل، لكن مجتش الفرصة نجربهم المرة دي.

انتهت تجربتنا في المكان، اللي كانت إيجابية بدرجة كبيرة، ونتمنى إدارة المحل تاخد بالها من ملاحظتنا، وأكيد هنروح تاني ونستمتع بالقعدة هناك.