The Definitive Guide to Living in the Capital , Cairo , Egypt

بقلم وكاميرا: رنا شرف

جروبي، اسم ارتبط معانا كتير بأفلام الأبيض والأسود، خصوصًا لما كنا بنسمع نجوم الفن الجميل بيقولوا إحنا رايحين نقعد في جروبي، أو جبنا الجاتوه من أعرق محل في مصر وهو جروبي.

المكان اسمه ارتبط  بأجيال كتير كانت بتعتبره محل للطبقة الراقية والناس الشيك، ومش كتير يعرفوا إن جروبي لسة موجود لحد النهارده في وسط البلد.

تعالوا نعرف أكتر عن جروبي.

بداية جروبي في مصر

جاكومو جروبي (اتولد 1863 – مات 1947)، الراجل السويسري ده هو اللي أسس جروبي لما وصل مصر سنة 1889، وقتها أسس أربع محلات للحلويات الغربية في مصر، وجروبي هو أول محل دخل الآيس كريم –بالطريقة المودرن- في مصر.

أشهر فروع جروبي هو فرع سليمان باشا، واللي كان مكان لكبار شخصيات الدولة زمان، وأي حد أجنبي متعود على الأكلات الغربية كان لازم يروح هناك.

المكان كان مشهور بحاجات كتير، زي الكاساتا، والآيس كريم، والمارون جلاسيه، وحاجات أكتر كان جروبي منفرد بيها ومش موجودة غير فيه.

جروبي والمشاهير

زي ما قولنا؛ جروبي كان للطبقة الراقية والمشاهير من الفنانين والسياسيين، ومن أشهر رواده، أم كلثوم، وفاتن حمامة، وأحمد رمزي، والسيدة جيهان السادات، والملك فاروق.

جروبي ماكنش بس محل للحلويات والآيس كريم، لكنه كمان كان بيعمل أطباق غداء وعشاء وإفطار.

جروبي النهارده

روحنا جروبي فرع 46 شارع عبد الخالق ثروت، قعلشان نعرف هل لسه جروبي زي زمان ولا اتغير.

أول ما هتدخل المكان هتلاقي ديكور بسيط جدًا، مش مبهر، هتحس إنه قديم، بس هيخليك تحس إنك في جو كلاسيكي كده.

المكان فيه كل حاجة ممكن تتخليها، جاتوهات وشوكولاتة بأنواعها ومشروبات ساخنة وباردة، فعلًا مكان لطيف. وغير القعدة العادية، المكان فيه كمان حديقة صغيرة، ودي مناسبة جدًا في جو الصيف.

حسينا إن المكان أسعاره معقولة، مش غالية قوي ومش رخيصة، بس فعلًا مكان يخليك تحس بأيام زمان الجميلة.