The Definitive Guide to Living in the Capital , Cairo , Egypt

لأننا دايمًا بنعطى فرص ثانية فى موقع كايرو 360 للأماكن اللى بنروحها ونكتب عنها مقال نقدي وتاخد تقييم قليل، بنروح ثاني بعدها بفترة علشان نشوف هل حصل تحسين فى المستوى ولا لأ، وكمان المطاعم اللى بتاخد تقييم عالى ما بتضمنش على موقعنا أنها بقيت فى خانة الأمان وكتبنا عنها مقال نقدي حلو خلاص، دي حاجة بتضمن أن المطاعم أو الكافيهات اللى مستواها ضعيف تحاول تحسن من نفسها، والقوية تفضل محافظة على مستواها أو تبقى أحسن كمان.

فى داندي مول حيث المطاعم اللى موجودة فى الجزء الخارجي اللى قبل ما تدخل المول نفسه، رحنا قبل كده لمطعم "جراند كافيه – Grand Cafe" التابع لشركة أمريكانا وكتبنا عنه مقال نقدي، كان تعليقنا وقتها أن المشكلة كانت فى التراب والقطط والذباب لأن دي مشكلة أذلية لأى مكان موجود فى الأوت دور، لحسن حظنا فى الزيارة دي اختفيت القطط لكن تبقى التراب اللى محتاج متابعة دائمة، وكمان الكنب من كثر ما هو معرض للشمس نشف شوية، كمان المكان مالوش حمام بس ممكن تدخل اللى فى فرع هارديز اللى جنبه، وللأسف كان سيء للغاية ومهمل.

بدأنا طلباتنا بطبق بيكاتا بالمشروم (75 جنيه) بينزل معاه سوتيه وبطاطس محمرة، وكمان طبق كباب (75 جنيه) مع نفس الطلبات الجانبية، ومن السلاطات اختارنا سلاطة فتوش (27.50 جنيه).

أول حاجة نزلت لنا كانت السلاطة اللى كان دبس الرمان فيها مخفف جدًا لدرجة ما كناش حاسين بطعمه، طلبنا من الجرسون يزوده لنا ولما رجع برضه كان الطعم مخفف بس باين شوية عن قبل كده، مش عارفين هما ليه عاملينه كده على الرغم أن دي أكثر حاجة بتميز الفتوش هى والسماق.

بالنسبة للأطباق الرئيسية البيكاتا بالمشروم كانت مستوية كويس ومعمولة فى صوص غني وكمية المشروم كانت معقولة بالنسبة للحم، الخضار السوتيه كان شوية منه مستوى وشوية مقرمش أوى، والبطاطس المحمرة عادية بس كويسة، مافيهاش حاجة Special.

الكباب كان الصراحة أكثر من رائع، قطع الكباب كانت مستوية كويس أوى وما كانتش بتشد زي ما أماكن كثير بتفشل أنها تسويه كويس أو بالدرجة المضبوطة، وكمان تتبيلته كانت باينة أوى فى الطعم.

ختمنا قعدتنا بعصير ليمون بالنعناع (22 جنيه) ومن التحلية جيرمان أبل كيك German Apple Cake بـ (33 جنيه) بينزل معاها بولة آيس كريم فانيليا ورشة قرفة وصوص كراميل، الليمون بالنعناع كان حلو بس عادى، اللى كان وهمي الأبل كيك، كانت طرية جدًا والتفاح مهرى جواها وطعمها مع الآيس كريم وصوص الكراميل نقلها فى حتة تانية خالص خلتنا مش عاوزينها تخلص.

برضه زي فى زيارتنا اللى فاتت الجرسون كان مهتم بمعرفة رأينا فى الأكل والخدمة من خلال ورقة الاستبيان اللى بتنزل مع الشيك، قولنا تعليقاتنا وكانوا مهتمين بها جدًا، إلا أننا عندنا تعليق صغير هنهمسه فى ودن أصحاب المكان، أنهم محتاجين يغيروا من الأصناف اللى بيقدموها لأنها بقى لها فترة زي ما هى بدون تجديد، لكن عامة إحنا اتبسطنا فى زيارتنا.