The Definitive Guide to Living in the Capital , Cairo , Egypt

من أهم التحديات في عالم الأكل هو المحافظة على مستوى ثابت، وعشان كده شوفنا مشاكل بتحصل لكتير من المطاعم والكافيهات والمخابز أول لما بيفتحوا فروع جديدة. من حسن الحظ إن “تي بي إس-TBS” قدروا يحافظوا على مستواهم طول التسع سنين اللي فاتوا.

في يوم مشمس جميل كنا في بيفرلي هيلز وقررنا نخطف رجلينا ونطلع على فرعهم في ويست تاون هب. الفرع هناك صغير وفيه ترابيزة عالية وخمسة كراسي زي معظم فروعهم، والفكرة إنهم بيعتمدوا أكتر على فكرة التيك آوت. عرض منتجاتهم مقسوم جزئين، على الشمال مخصص عشان تعمل ساندويتشك بنفسك ووراه بتشوف أرفف العيش اللي تفتح النفس، وعلي اليمين تشكيلة مغرية من الدوناتس والكرواسونات والتارت وغيرهم.

كنا متحمسين جدًا لتجربة الروست بيف، لكن للأسف ماكانش متوفر يومها، فقررنا نجرب كونتري ستايلد تشيكن سالاد ساندويتش  Country-Style Chicken Salad Sandwich ثمنه (30 جنيه) وده عبارة عن فراخ غرقانة مايونيز وعليها كرنب أحمر مخلل له طعم مسكر وبصل وخس وطماطم مع توست بطعم الجزر (3 جنيه) اللي بيضيف للعيش لون برتقالي لطيف وكمان صحي أكتر. جايز شكل تقديم الأكل مش على المستوى، بس الساندويتش كان هايل وكل مكوناته طازة ويعتبر اختيار هايل لعشاق الساندويتشات الباردة المليانة صوصات.

طلبنا كمان روستد تركي تشيكن ساندويتش Roasted Turkey Sandwich ثمنه (38 جنيه) ومعاه خضار سوتيه (٢٩ جنيه) – وده بناء على نصيحة الجرسون – وجبنة شيدر (٨.٢٥ جنيه) وجرجير – تغيير عن الخس – وصوص تي بي إس المخصوص، وكل ده في عيش شياباتا. وقعنا في غرام العيش من أول قطمة وطبعا طعم الصوص بالتوابل اللذيذة اللي عمل شغل مع التركي. نقطة سلبية وحيدة كانت السوتيه اللي مقدرش يضيف أي جديد للساندويتش.

نروح على الحلو ونبتدي مع بلوبيري تارت (16.50  جنيه) وبعدين واحد كرواسون نوتيلا (20 جنيه) ودونات سكر وعسل (14 جنيه). صحيح الاسم مختلف عن الواقع، بس عموما التارت كان أقرب لمافين قوامه أسفنجي وعليه بلوبيري أضاف طعم فاكهة مسكر لذيذ.

أما الدونات فكانت خفيفة ومش مزيتة وفيها كمية مربى فراولة معقولة. الشكوى الوحيدة عندنا إن الدونات كانت من غير حشو ومتقطعة نصين والمربى كميتها أكبر من السكر وكأنهم عاملين ساندويتش دونات. مفيش كلام يوصف كرواسون النوتيلا بقوامه الخفيف المقرمش وطعم الزبدة الجميل ولونه الذهبي، وطبعًا كمية النوتيلا المحترمة والتغليف الشيك. كرواسون تي بي إس هيفضل رقم واحد عندنا مهما حصل.

نقدر نقول بكل ثقة إن تي بي إس قدروا يحافظوا على مستواهم. المبهر كمان إن عندهم عشر فروع في مصر، ورغم كده كل حاجة عندهم طازة ومعمولة بمزاج.