The Definitive Guide to Living in the Capital , Cairo , Egypt

عارفين لما تروحوا مكان تدخلوا منه على مكان ثاني، كأنكم عبرتم من عالم لعالم، هو ده اللي حصل لنا بالضبط لما رحنا “تورتينا – Tortina”، واكتشفنا أنه داخل مترو ماركت في شارع اللاسلكي. أول ما بـ تدخل بـ تلاقي تورتينا على أيدك اليمين واخدة جنب أمام ثلاجة الفاكهة وجنب الكاشير، فـ تخرج من عالم التسوق لعالم السرحان والتوهان في الشوكولاتة وجمالها. الحقيقة أننا كنا محتارين جدًا، نختار إيه ولا إيه من كثر ما كل حاجة عنده حلوة قوي، وشكلها مغري فعلًا، تحس في حوار كده ما بين كل قطعة جاتوه وبينك: “كلني أنا.. لأ كلني أنا”.. وتفضل محتار لحد ما الحمد لله تختار.

أول حاجة اختارناها وهي ملكة اليوم قطعة من تارت البراونيز بـ 18 جنيه، الملكة اللي تربعت على عرش قلوبنا، عبارة عن دائرة صغيرة لونها بني أول ما بـ تحب تفتحها بالشوكة تكتشف السر أنها من طبقتين، طبقة الشوكولاتة اللي فوق، وطبقة الكيك الهشة والطازة اللي تحت، واللي مزينة بالمكسرات وكأنه الألماظ اللي بـ يتوج التاج، ولما بـ تتعمق في نصفها، تحكي لك عن مكنون قلبها أن جواها شوكولاتة بيضاء وبندق. أما بقى عن الطعم، عارف لما تفضل تذوق حاجة وتبقى مش عاوزها تخلص من كثر ما هي جميلة.. خسارة كانت صغيرة، بس في الجون.

بعد كده جربنا قطعة من تارت مارس بـ 17 جنيه، ودي بقى كانت الوصيفة الثانية لملكة الجمال، كانت عبارة عن ثلاث طبقات، طبقة كراميل مبهج، وطبقة كريمة منعشة، وآخر طبقة شوكولاتة مقرمشة لذيذة، الثلاثة مع بعض في شوكة واحدة، يخرجوك متمزج ومتسلطن بإبداع الشوكولاتة مع الكراميل والكريمة.

أما عن الوصيفة الثالثة يا سيدي الفاضل، فاستعد وجمد قلبك كده لامتزاج النكهات الممتعة، قطعة من تارت الكراكاس بـ 16 جنيه. لو أنت من محبي الكريز هـ تتمزج، أول طبقة جيلي الكريز المركز اللي فيه قطع كريز صغيرة بلونه الغزالي اللامع، مع ثاني طبقة من التشيز كيك الخفيفة جدًا لدرجة أنك ممكن تطير معاها، والمفاجأة اللي بـ نختم بها الطعم طبقة البراونيز المقرمشة اللي هـ تدوخك من جمالها وطرقعتها.

وزي ما كل حاجة حلوة لازم تبقى ناقصة حاجة، تارت المانجو بـ 15 جنيه، سببت لنا خيبة أمل كبيرة، لأن طعم المانجو والكريمة كان تحفة وطازة، بس تيجي تكسر قطعة التارت بقى ما تعرفش، لأنها كانت ناشفة جدًا، فـ تبقى بـ تحارب علشان تخترق الطبقة الأخيرة، اللي المفروض تبقى طرية ورفيعة مش ناشفة وسميكة.

نختم مملكة الحلويات اللي كنا فيها دي بتارت لوتشي بـ 15 جنيه، واللي كانت فعلًا مميزة ومنعشة وتعمل لك قلبان في دماغك من جمالها، وهي عبارة عن طبقة من التوت المنعش، وبعد كده طبقة من كريمة الزبادي الفاتنة، وآخر طبقة بقى مكونة من الكيك الطري الشهي والطازة.

أجمل حاجة في حلويات تورتينا أنها خفيفة ونكهاتها قوية، كمان تورتينا مش بـ تقدم ده بس، هي بـ تقدم كوكيز شهية جدًا، وميني كوكيز كده عاملة زي البيتي فور، بـ تبقى بسكويت مُغطي بالشوكولاتة بنكهات مختلفة وبـ يُباع بالكيلو، والحقيقة أننا جربنا واحدة بالليمون وكانت شهية جدًا وطازة، كمان بـ يقدم كيك وكب كيك للحفلات بالشكل اللي أنت عاوزه، والمصاصات اللي بالشوكولاتة Lollipops، وحلويات شرقية زي البسبوسة والكنافة وأم على، بس الأحسن أنك تطلبها مخصوص لأنها مش دائمًا بـ تتوافر بكثرة في المحل في الوقت ده. ولو حابب تشوف المنيو بتاعهم هـ تلاقيه موجود على صفحتهم في الفيسبوك، واللي بـ تعرض تشكيلة كيك تحفة.