The Definitive Guide to Living in the Capital , Cairo , Egypt

كانت بداية «تريانون-
Trianon» فى اوروبا حوالي عام
1555، وإشتهر كمكان لشرب الشاي لما فتح في إسكندرية عام 1905 فى وقت المجتمع في
إسكندرية كان عالمي من الدرجة الأولى.

«تريانون»
موجود فى إسكندرية فى فندق «لا ميتروبول – La Metrople» اللي على الكورنيش.
الكافيه واخد نص مساحة الدور الأرضي للفندق. اول ما تدخل «تريانون» هـ تلاقي أبواب
خشب غامقة بـ ترحب بيك وبـ ترجعك لعصر ومجد قديم وهـ تختبر المعنى الأصلي لمكان
شرب الشاى القديم. اول ما تدخل «تريانون» هـ تحس بإحساس ملكي وده مش غريب على مكان
كان بـ يستضيف رموز فنية عظيمة وكبار الشخصيات زي «ام كلثوم» والشاعر اليوناني «كـﭬافي
– Cavafy».

تصميم «تريانون»
الداخلي فى رسومات على الحيطان بأسلوب آرت ديكو Art Deco (دي موجة تصميم شعبية انتشرت في العشرينات) وخشب غامق وسجاد لونه اخضر فاتح كل ده بـ يديك احساس بالرجوع
الى حقبة الأصالة والزمن القديم. وكمان الويترز لابسين ملابس التقديم التقليدية
وشكلهم نظيف ومهندم.

رغم
ان الخدمة كانت كويسة لما كنا هناك، إلا اننا عشان ننادى الويتر من آخر المكان كان
شىء صعب شوية. طلبنا الإسبريسو٬
اتقدمت بشكل لطيف وكان طعمه حلو وكان بـ 9 جنيه.

من احلى الأطباق فى الكافيه أطباق الفطار، بس المشكلة ما
بـ يتقدمش بعد الساعة 11 صباحا، فلو عاوز تلحق فطار المحل اللذيذ وتستمتع به في جو
الإسكندرية الجميل٬ لازم تروح بدري.

إحنا طلبنا «كلوب ساندوتش – Club
Sandwich»
وكان بكبر الطبق وبـ يتقدم مع بطاطس مش حلوة قوي، السندويتش مكون من ثلاثة طبقات توست
وكل طبقة سايح عليها كمية جبنة كتيرة. التوست كان محشي لانشون ديك رومي، خس،
طماطم، والطبقة الأولى كان عليها كلها جبنة شيدر، وثلاثة شرائح بيض عليها زيتون
اسود وده كله بـ 30 جينه.

«الفريدو باستا – Alfredo
Pasta»
مكرونة كانت صغيرة فى الحجم بس كان طعمها غنى جداً، والطبق كان مليان بالكريمة
والفراخ وصوص عبارة عن مزيج إيطالى تاني والطبق كان بـ25 جينه، وكان في المنيو
انواع تانية من السندويتشات والباستا وكمان انواع كتيرة من السلاطات والشوربة واسعارهم
تتراوح ما بين 15- 50 جنيه.

«تريانون» فى الإسكندرية من الكافيهات اللي بـ تجذب
السائحين وكل اللي عاوزين يرجعوا لإسكندرية بتاعة زمن الابيض والأسود الي بـ نشوفوا
فى الافلام. ارجعوا بالزمن وروحوا «تريانون» واستمتعوا بمنظر البحر الرائع من
هناك.