The Definitive Guide to Living in the Capital , Cairo , Egypt

كافيه ومطعم «بيرتس – Bert’s» الفرنسي كان له معَزة خاصة عندنا
ييجي من 3 سنين فاتوا، كنا كل ما نكون فى المهندسين نروح نقعد فيه ونستمتع بمنظر
الشارع المتفرع من شهاب من خلال واجهته الزجاج المحيطة بالمكان كله، بجد له ذكريات
حلوة معانا، وبعد مرور 3 سنوات رجعنا علشان نستعيدها لقينا المستوى بتاع زمان
اختلف كثير.

المكان بقى مُهمَل، الكنب فرشه قِدم،
المنيو لما مسكناها كان عليها تراب، الجو العام بقى كئيب، الجرسونات مش بنفس
الحماس بتاع زمان، وكمان كانوا معليين صوت التليفزيون قوي لأنهم كانوا بـ يتابعوا
أخبار نتائج الانتخابات الرئاسية كأنهم قاعدين فى بيتهم وواقفين مترصصين أمام
الشاشة!

المكان مكون من دورين: اللى تحت
كافيه واللى فوق مطعم، تحت وأنت داخل من خلال كام سلمة هـ تلاقى على أيدك اليمين أرفف
مكتبة فيها مجموعة كتب لأحدث الإصدارات. وزي ما قلنا قبل كده المكان واجهته كلها
زجاج من فوق لتحت وفى الدور اللى فوق برضه، طلعنا الدور اللى فوق، المكان ما تغيرش
من ساعة آخر مرة جئناه، بل على العكس حسينا أنه أصبح باهت، مافيهوش ناس كثير،
الكنب فرشه قِدم وفيه قدر من الإهمال، المطبخ الصغير اللى فوق فاضى مش وظيفته غير
أن فيه “سيرفيس” الترابيزات ومناديل.

المنيو مش كبيرة قوي، العادي فى
أى منيو هـ تلاقى أطباق رئيسية ومشروبات ساخنة وبادرة وشوربة وتحلية وسلاطات
وباستا وساندويتشات. كنا خايفين صراحة أننا نلاقى الأكل كمان اختلف عن زمان، فـ طلبنا
بتَرقُب شوربة طماطم (14 جنيه) وطلبنا يتحط عليها كريمة، ومن الأطباق الرئيسية اختارنا
تشيكن كاري (48 جنيه) وبـ ينزل لك اختيارين من الأطباق الجانبية فـ اختارنا بطاطس
مهروسة وخضار سوتيه.

نزل لنا زجاجة مياة صغيرة (4
جنيه)، الأكل أخذ شوية فى التحضير، التقديم جاء لنا جميل وألغى شوية إحباطنا اللى
فات وكان شكله مبهج، الشوربة كانت لطيفة بس فيه اللى أفضل منها ذقناه فى أماكن
ثانية، والكمية حلوة تشبع، الفراخ كانت مشبعة بالكاري لدرجة كان فيها مزازة بس
مقبولة، الفراخ كانت مستوية كويس، لكن البصل كان فيها كثير، الخضار السوتيه كان
حلو وكميته مناسبة مع الفراخ، البطاطس المهروسة كانت طرية جدًا وسِواها مضبوط
وملحها كمان.

منيو المشروبات مافيهوش أى حاجة
مميزة، والتنوع مش كثير لدرجة أننا ما تحمسناش نطلب حاجة، انتقلنا لقسم التحلية
على طول اللى شدنا فيه تيراميسو بآيس كريم موكا (20 جنيه)، ما تأخرش الطلب قوي،
التيراميسو كان على شكل Slice
كيك مثلثة وفيها طعم القهوة قوي ومبشورة كمان من فوق وجنب القطعة دي بولة الآيس
كريم، المزيج بين الاثنين عمل توازن لأن الكيك لوحدها كانت هـ تكون ثقيلة خاصة
أنها غنية بالقهوة، ومزج الطعم النهائى كان حلو قوي استمتعنا به لآخر فتفوتة.

فيه خدمة وضريبة بـ تضاف، وفيه
خدمة Wi-Fi بس بـ تشتري كارت (مش متوفر
مجانًا) وشيشة كمان، إحباطنا بفقد المكان لبريقه عوضه شوية الأكل والتحلية، لكن ده
ما يمنعش أننا كنا مش حاسين بالانبساط اللى كنا بـ نحس به زمان، المكان محتاج
يشتغل على نفسه حبة حلوين علشان يقدر ينافس كافيهات ومطاعم كثيرة حوله فى المنطقة،
نأمل ذلك.