The Definitive Guide to Living in the Capital , Cairo , Egypt

الآيس كريم بالنسبة لنا متعة من متع الحياة اللي ربنا رزقنا بها، علشان كده مش بنتهاون أبدًا في الطعم أو أسلوب التقديم، خاصة أن أسلوب عمل الآيس كريم على ترابيزة ساقعة بقيت موضة واتكررت كثير جدًا في أكثر من محل الفترة الأخيرة، فيه منهم اللي نجح وفيه منهم اللي ما عرفش يضبط التركيبة الصح، بوظة رول – Boza Roll فتح 3 فروع حاليًا، بس هل يا ترى عرف يضبط الخلطة السرية لآيس كريم مبهج وطعمه متوازن ولا لأ؟

المكان صغير أمام سوبر ماركت مترو في شارع 9، للأسف مافيش ترابيزات تقعد عليها أو كراسي حتى، وده شيء سيء جدًا لأن للأسف ده معناه أننا هنقعد أو نقف في الشارع، اليافطة بألوان كثيرة متنوعة وكانت مبهجة جدًا، أما المنيو كان عادي ما بين أنواع الشوكولاتة والفاكهة لكن الاختلاف أنك بتختار نوع الآيس كريم إذا كان فانيليا ولا زبادي ولا آيس كريم سعراته قليلة، قررنا نختار أكثر من حاجة مختلفة، فطلبنا آيس كريم بنكهة توت متنوعة (15 جنيه) وآيس كريم براونيز وكراميل بنفس السعر، وآيس كريم ليمون وBlueberry برضه بنفس السعر.

إحنا ما استنيناش كتير برغم أن هما مشغلين ماكينتين بس من أصل 4، وبدأنا نتفرج عليهم وهم بيعملوا الآيس كريم، اللي لاحظناه أن كمية الفاكهة أو الصوص قليلة بالنسبة لحجم الآيس كريم يعنى ممكن نقول بنسبة 1:3، أول حاجة خلصت كانت آيس كريم البراونيز والكراميل، وللأسف حطوا قطعة براونيز صغيرة جدًا ونتيجة لده تقريبًا ما حسيناش بطعمها، وبننصح أنهم يبقوا يحطوا معاها نوتيلا أو يكبروا قطعة البراونيز هتفرق في الطعم أكيد، كمان ميكس التوت واللي زودنا عليه فراولة بـ 5 جنيه، ما كانش قوي برضه زي ما كنا متخيلين، يعني لو زودوا الكمية بس هنكون مبسوطين جدًا، أما اللي كان طعمه حلو جدًا هو آيس كريم الليمون مع الـ Blueberries لأن كميته كانت كبيرة وإن كان صوص الليمون كان قليل برضه.

بشكل عام تركيبة الآيس كريم في "بوظة رول" متوازنة وحلوة جدًا ناقصهم بس يزودوا كمية الحاجات اللي بتخلي للآيس كريم نكهة، ويحطوا كراسي أو ترابيزات.