The Definitive Guide to Living in the Capital , Cairo , Egypt

فيه حاجة واحدة تقدر تبني كافيه أو مطعم وهي احتفاظه بلمسته المميزة سواء كانت تقديمه لأطباقه الخاصة أو مشروباته المختلفة أو حتى شكل ديكورات مميز، في باباروتي، الفكرة هي الفطائر المغطاة بالقهوة اللي بـ تعجب زوار المكان.

باباروتي فتح في مشروع سوديك الراقي ويست تاون، وهناك بـ يقدم قعدات داخل وخارج المكان. طلبنا من الجرسون مكان بره، وعلى طول وصلّنا وقدم لنا المنيوهات، لأن وقت زيارتنا المكان كان مليان ناس، حسينا أن الكراسي والترابيزات لازقين في بعضهم والجو العام كان مُقبض.

بدأت المنيو بقسم "بابا كومبو" اللي فيه مشروبات غنية بالكافيين منها الكابتشينو وشاي بنكهات مختلفة وكافيه لاتيه، مع مشروبات خالية من الكافيين منها شوكولاته مثلجة وسموزي فواكة متنوعة مع فطيرتهم المميزة (37-43 جنيه). تقدر كمان تطلب المشروبات أو الفطائر لوحدهم. مشروبات ثانية شدتنا منها بابا بلاك تي (15 جنيه) وبابا شوكو شوت (25 جنيه) وأسبريسو ماكياتو (21 جنيه).

علشان مفيش أي أكل في المنيو غير الفطائر، باباروتي بـ يقدم إمكانية اختيار مكونات فطيرتك واختيار إضافاتها من بين الشوكولاتة أو العسل أوال مكسرات أو الكراميل أو حتى الجبنة.

كنا محتاجين جدًا لمشروب مثلج ينعشنا، وعلشان كده طلبنا سبشيال بليند كوفي المثلج (27 جنيه)، وسموزي مانجو (25 جنيه) وسموزي فراولة (25 جنيه). بعد عشر دقائق وصلت مشروباتنا ومعاها فطيرتين سخنين هدية من المكان.

السبيشال بليند كوفي كان مختلف خالص عن وصف الجرسون، مسكّر بزيادة وينقصه نكهة القهوة المميزة، الحقيقة أن طعمه كان أقرب لمياه بنكهة الكراميل أكثر من مشروب مبني على طعم القهوة، نفس الكلام مع سموزي الفراولة المليان سكر بزيادة، أما سموزي المانجو فكان ممتاز وواضح في طعمه المانجو الطازجة.

الفطائر الساخنة كانت لسه خارجة من الفرن وطعمها كان مختلف عن الشكل التقليدي اللي كلنا عارفينه، يمكن أقرب لعيش مسكّر بالزبدة عليه طبقة من القهوة والكراميل.

عمومًا، باباروتي بـ يقدم حالة من الخدمة الممتازة ومشروبات منها الحلو ومنها الضعيف وسط مكان لطيف وإن كان فوضوي شوية، رغم أن الفطائر وسموزي المانجو كانوا تحفة، سموزي الفراولة والكوفي بليند ما قدروش يبهرونا.