The Definitive Guide to Living in the Capital , Cairo , Egypt

الكافيهات في القاهرة مؤخرًا بقيت من أكثر الأماكن اللي الناس بـ تخرج فيها سواء خروجة عاطفية أو حتى تجمعات صحاب أو قرايب، مع الوقت كل كافيه بـ يفتح جديد بـ يحاول يحط مفهوم جديد للخروجات.

في شارع طه حسين في الزمالك، كافيه القهوة بـ يحاول يحط ويثبت نفسه بلمساته العصرية والتقليدية في ديكوراته علشان تبقى شبه القهاوي بجد، القهوة عبارة عن دورين والمكان كله مغطى بالزجاج.

الديكور كان عبارة عن حائط أزرق وشوية زهري متوزع بطريقة عشوائية وعليها صور كلاسيكية في كل مكان، وعندهم كراسي خشب ملونة بالأخضر والأصفر، في وقت زيارتنا الدور اللي فوق كان مقفول وما حدش قاعد فيه، فكان لازم ندور على ترابيزة في الدور اللي تحت وده كان صعب علشان المكان تحت ضيق شوية.

أماكن الجلوس كانت محدودة جدًا فكنا مخيرين ما بين أن إحنا نقعد جنب الحمام وسماعات الصوت أو أن احنا نقعد قريب من الباب في مدخل الكافيه فاختارنا نقعد عند المدخل.

جاء لنا الويتر وكان لطيف جدًا وسلم لنا المنيو اللي كان مليان قائمة كبيرة جدًا من الإفطار والمقبلات والسلاطات والساندويتشات والمعجنات والطواجن للغذاء وكمان حلويات ومشروبات.

قررنا نبدأ طلبنا بواحد من كومبو ميني (30 جنيه)، ميلك شيك بالموز والشوكولاتة (24 جنيه) وعصير ليمون فريش (13 جنيه)، الكومبو أخذ وقت علشان ينزل لنا، بس أول ما وصل إحنا سامحناهم مع أول سمبوسة مقرمشة بالجبنة أكلناها، الطبق كمان كان فيه ستيك بالجبنة ودوريتوس ومعاه صوص حار وصلصة وحلقات البصل.

أول اختيار شجعنا، اختارنا كمان ساندويتش شاورما لحمة (24 جنيه) وطاجن فتة (20 جنيه)، وصل لنا مولع وشكلنا هـ ننبسط، الطبقين وصلوا فى وقت قصير جدًا، على الرغم أن الحشو داخل الساندويتشات كان كبير أوي، قطع اللحم كانت جامدة شوية وكانت مرهقة فى تقطيعها، الساندويتش كان مقطع نصفين وجاء معاها بطاطس محمرة وسلاطة وطرشي مخلل جنان.

فى نفس الوقت، الفتة وصلت فى طاجن مزخرف بمربعات عيش محمص، وبصل مشوح لذيذ، وكمية كبيرة من الثومية مزينة بأوراق البقدونس، الفتة من الآخر كان طعمها حلو أوى.

الشوكو بنانا شيك وعصير الليمون قدموا خلال الوجبة، قوامهم ثقيل وفيهم حبة شوكولاتة، طعم البنانا شوكليت كمل لنا التجربة بتاعتنا بحلاوتها، عصير الليمون كان منعش بطريقة تجنن وكان فيه لذاعة حلوة.

وأخيرًا، للحلو استقرينا على الكراميل تشيز كيك (18 جنيه)، ولاتيه (19 جنيه) وقهوة تركي (9 جنيه)، أول ما أخذنا قطمة من التشيز كيك وقعنا فى حبها، حلاوة الكراميل امتزجت مع الكيك علشان تعمل مزيج مثالى من الطعم مع القوام، كمان اللاتيه والقهوة التركي كانوا مش مميزين أوى لكن طعمهم حلو.

القهوة مش مكان هادئ خالص تقعد فيه، بس أول ما يفتحوا الدور اللى فوق أكيد هـ يكون المكان مغري وجذاب أنه يشد الناس تدخل من أبوابه.