كلنا متفقين إن القهوة على اختلاف مسمياتها وأشكالها وألوانها ممكن تعدل يومك أو تشقلبه. ملوك القهوة زي ستاربكس وكوستا فضلوا مستقرين على عرش مملكة القهوة بفروعهم الموجودة في كل مكان، والناس بتروح لهم مخصوص علشان يستمتعوا بقهوتهم المميزة. دلوقتي ظهر منافس جديد على الساحة.
اسبريسو لاب صاحب الأصول التركية وصل مصر وتحديدًا في مول بوينت 90، ومعاه يقدر عشاق القهوة يخترعوا قهوتهم اللي تعدل دماغهم.
اسبريسو لاب بديكوراته البسيطة بيقدم أجواء هادية، وبنشوف فيه كراسي خشب عاملة شكل لطيف للمكان وكمان يعتبر مكان هايل للمذاكرة أو الشغل أو لو عايز تستمتع بفنجان قهوة مزاج.
المكان هنا قايم على فكرة اخدم نفسك بنفسك، وفيه بارين كل واحد فيهم عليه حاجات معينة؛ يعني البار الأولاني مثلًا عليه ماكينة الاسبريسو الكبيرة اللي كلنا عارفينها ومعاها مجموعة من السناكس الحادقة والمسكرة وشوية مشروبات باردة، أما البار التاني فهو “المعمل”.
طلبنا من البار الرئيسي واحد كولد برو كوفي cold brew coffee (30 جنيه) اللي بيتقدم في زجاجة صغيرة شبه علبة الويسكي، والقهوة كانتنقية ومافيهاش أي إضافات وطبعاً نكهتها قوية وبتسيب طعم لاذع شوية.
كنا عايزين نجرب حاجة تانية، واختيارنا كان هوت شوكليت بالبندق (32 جنيه)، واللي طعمه كان مسكر وغني بالشوكولاتة مع كمية كويسة من الفوم على الوش، وكمان البندق عمل طعم مميز.
بعد جولة سريعة مع ساندويتشاتهم طلبنا روست بيف (35 جنيه) بيتسخن في التوستر، والعيش كان سخن ومقرمش مع الجبنة السايحة اللي عملت طعم مميز، والتركيبة دي مع طعم شرائح الروست بيف مع المخلل والمايونيز عملوا شغل عالي.
طبعًا مافيش نهاية للأكل أحسن من حاجة حلوة، وعلشان كده طلبنا تشيز كيك بالشوكولاتة (40 جنيه) والتوت البري (40 جنيه)، ويمكن حجمها صغير شوية، لكن الكريمة الغنية وطعم الكيكة المميزة أثبتوا أنها تستاهل السعر الغالي. الشوكولاتة كانت غنية وطعمها هايل، أما التوت فكان مزز شوية، ونكهة القهوة في الاتنين عملت طعم مميز.
بعدها روحنا على بار الاسبريسو، واللي تقدر فيه تختار قهوتك من بين ستة أنواع حبوب قهوة – وتختار طريقة تحضيرهم كمان من بين ستة طرق تحضير –زي الفرينش بريس وChemex وآيرو بريس وكولد بروcold brew. بكده تقدر تتحكم في كل حاجة من أول درجة السكر لقوة قهوتك؛ إحنا قررنا نجرب Syphon (27 جنيه).
القهوة اللي تتميز بقوامها الخفيف من غير الطعم القوي اللاذع اللي بيفضل موجود بعد ما تشرب قهوتك سكرها كان مضبوط، وطلبنا معاها Irish syrup مع لبن مغلي علشان نعمل لاتيه، والفكرة دي خلت الطعم أحلى وأحلى.
اسبريسو لاب أكيد بيقدم واحدة من أحلى تجارب القهوة اللي هتلاقيها في #كايرو، وكمان يعتبر مكان هايل لو عايز قهوة على السريع مع سناك خفيف، وطبعًا أي عاشق للقهوة مش هيمشي من عندهم!
