The Definitive Guide to Living in the Capital , Cairo , Egypt

الهدوء مهم جدًا، لما الأصحاب يحبوا يقعدوا مع بعض فـ يحكوا أخبارهم، ولما حد يحب يقعد مع مج كابتشينو لوحده من غير ما حد يزعجه، أو لما اثنين مرتبطين عاوزين يقعدوا مع بعض من غير ما يكون اللى قاعدين على الترابيزة اللى أمامهم سامعين كل اللى بـ يقولوه. ويا سلام لما يبقى الهدوء مع ديكور كلاسيك رقيق جدًا يحسسك بزمن الأبيض و الأسود والرومانسية بتاعة زمان.. إحنا شوفنا كل ده متوفر فى كافيه «إيتوال -«Etoile .
“إيتوال” عبارة عن 3 أدوار، الدور الأول للحلويات الشرقية والتورتات بأنواعها والدور الثانى للحلويات الغربية والدور الثالث هو الكوفى وبـ يقدم كل المشروبات الساخنة زى الشاى والنيس كوفى والكابتشينو والهوت شوكلت والميلك شيك وحاجات ثانية كثير ومشروبات باردة بأنواعها وعصائر فريش وفروت سلاط وجاتوه وكرواسون وآيس كريم.
إحنا لما روحنا شوفنا الأسعار كانت فى المتناول فمثلاً لقينا كابتشينو وكرواسون (12 جنيه) وآيس كريم (10 جنيه) وبيبسى مع جاتوه (12 جنيه) وفروت سلاط (10 جنيه) وميلك شيك (10 جنيه)، والآيس كريم بـ يُقدم وعليه إضافات مشهية جدًا زى صوص الشوكولاتة وبـ يكون تحفة وكراميل كمان وويفر بالكريمة، أما الكابتشينو كان مُقدم بشكل جميل وكان مرسوم على وشه وردة، الجاتوه كان ما يفرقش فى الجودة عن محلات الحلويات المشهورة. وبالرغم أن   الأسعار فى المتناول إلا أن الخدمة تحسسك أنك فى مطعم شيك جدًا.
والمكان بقى استراتيجى جدًا، هو بالضبط فى الإسعاف أمام دار القضاء العالى بجوار مطعم شبراوى، يعنى قريب من المواصلات ومحطة المترو.
إحنا وأصحابنا أخذنا على المكان وبقينا نتقابل هناك دائمًا، وفى مرة اتعمل لنا مفاجأة من أصحابنا واحتفلوا بعيد ميلادنا هناك، الكوفى كان بـ يحتفل معانا وشغلوا أغانى عيد الميلاد والجرسونات قدموا لنا الأطباق مكتوب فيها اسمنا وحسينا فى اليوم ده كأننا ملوك. تخيلنا بصراحة أن ترتيبات المكان تكلفت مبلغ كبير لكن بعد كده عرفنا أنهم ما دفعوش غير ثمن التورتة والمشروبات بس وكل مظاهر الاحتفال كانت هدية من الكافيه.
من الحاجات اللى هـ تخليك ترتبط بالمكان هناك معاملة الجرسونات ومستوى الخدمة، لأن الطلبات بـ تُقدم بسرعة وبـ تحس من طريقة التعامل أنك أفضل زبون هناك ولو شافوك متضايق شوية بـ يعملوا حاجات بسيطة تخليك تبتسم يعنى ممكن يرسموا لك على وش الكابتشينو وجه بـ يضحك أو قلب أو يرسم لك على الآيس كريم بالشوكولاتة، كمان الكوفى فيه Wi-Fi علشان لو عاوز تتصفح الإنترنت وأنت بـ تشرب حاجة.
لما هـ تروحوا هـ تتبسطوا بالمكان كثير وممكن كمان يبقى مكانكم المفضل.