The Definitive Guide to Living in the Capital , Cairo , Egypt

بتجمعنا علاقة طيبة مع إيتوال من زمان، لما كان فرعه الأشهر في الإسعاف، لكن مع الوقت إيتوال قدر يكبر إعجابنا بيه واحترامنا ليه، رغم مجموعة من المآخذ والمشاكل اللي كانت بتظهر من وقت للتاني، واللي فريقهم كان بيحرص بشدة إنه يحلها ويراضي العميل بأي شكل، مهما بلغت درجة التجريح والإساءة لكن الأداء العام نقدر نقول إنه عاجبنا لكيان بيحاول يكبر وينافس ويعمل اسم محترم بخامات وأسعار مرضية وحاطط رضا العميل عنده أولوية ودي حاجة نادرة جدًا.

المرة دي مش هنتكلم عنه كحلواني لكن هنتكلم عنه كمطعم وكافيه ومكان تقعد فيه مش بس تشتري منه وتمشي على طول، جربنا فرع الدقي، ودا فرع حديث نسبيًا، صحيح التجربة مكانتش كاملة 100% لكن كمان تستحق نحكيهالكم بالتفصيل في السطور الجاية.

البداية مع الأجواء العامة في المكان، القعدة مريحة وفي اختيارات إنك تقعد على ترابيزة عادية أو كنبة مريحة في جو حميمي، التكييف هينسيك الحر اللي برا، والمكان عمومًا نظيف، اللهم بعض الملاحظات زي إن مرة كانت الأرض ملزقة شوية، ومرة قعدنا على ترابيزة والويتر أخد وقت لحد ما جه ونضفها لكن عمومًا عاذرين كل ده لأن الضغط فعلًا شديد عليهم.

جربنا البيتزا خضروات وسعرها 28 جنيه ومكانتش الواو، العجينة بتاعتها أقرب للعيش الفينو، والمكونات صحيح لطيفة لكن مش ده المستوى اللي انتظرناه منهم، طلبنا كريب بالسوسيس، والحقيقة انبهرنا، بالتقديم، والمحتوى والطعم، والحجم والسعر، بـ 28 جنيه، كان غرقان من جوا جبنة بتمط، وفلفل ملون وسوسيس طعمه حلو فعلًا، اتبسطنا وشبعنا وكلبظنا، وطلبنا عصير برتقال ثمنه 17 جنيه اكتشفنا إنه فريش وطعمه جميل مش معلب، وكذلك باقي العصاير.

جربنا كمان الكابتشينو 22 جنيه لكن ماتبسطناش أوي لذلك هواة القهوة ماننصحكمش تطلبوا كابتشينو هناك لأن الماكينة مش قد كده، أما بقى الجاتو فده وهم لوحده، كذلك فطيرة النوتيلا والفطاير عمومًا عبقرية حقيقي ومشبعة، ونقدر ننصح بضمير مرتاح اللي نفسه في فطير محترم ومخدوم ويملى العين عليكم وعلى إيتوال على طول، ناهيك عن الوجبات والسندوتشات اللي أحجامها معقولة وطعمها كمان مرضي ويبسط.

الميزة اللي عند إيتوال حقيقي هي أعياد الميلاد، واللي صادف شوفنا اتنين منها وإحنا هناك، وده الكنز الحقيقي في رأينا، موقع ممتاز بيمثل حل لناس كتير في منطقة مافيهاش أماكن كفاية للقاءات، التورتة بتشتريها من نفس المحل في الدور الأرضي ما بتضطرش إنك تمشي بيها في مواصلات، الخدمة للشخص الواحد تمنه 25 جنيه ماعدا الخميس والجمعة والسبت الفرد بـ 40، والتمن دا بيشمل تقديم التورتة، وتقطيعها ومشروب للمعزومين، غير إن المكان لحظة دخول التورتة بالاتفاق فجأة بيضلم وبتشتغل اغنيتين من اختيار صاحب عيد الميلاد أومن اختياركم لو عاوزين تفاجئوا شخص معين بعيد ميلاد مفاجئ.

عموما الإضاءة كويسة، و الخدمة معقولة، وأسعار التورت كمان مقبولة جدًا، هي والجاتو، سواء طالعين تتغدوا أو تحلوا أو تعملوا عيد ميلاد، أو تشربوا حاجة وتريحوا شوية هاتتبسطوا والأسعار المكتوبة في المنيو شاملة كل حاجة، مضايقناش في الفرع إلا الكاشير اللي أخد الفلوس ومادناش الباقي الفكة اللي لينا، على اعتبار انه خلاص بقى، نتمنى من إدارة إيتوال إنها تنبه عليهم في موضوع “الفكة” لأنه مكانش أول احتكاك في إيتوال الدقي سواء مع كاشير المطعم أو كاشير الحلويات تحت، ونصيحتنا لو رايحين خلوا معاكم فكة عشان احتمال ماتاخدوش الباقي.