The Definitive Guide to Living in the Capital , Cairo , Egypt

كتير مننا يوم الفلانتين بيحبوا يخرجوا ويقضوا وقت ممتع ولذيذ مع اللي بيحبوهم، لكن علشان تلاقي مكان بيجمع بين القعدة المريحة والمنيو بتاعته ظريفة، والجو حلو ومش زحمة، وفي نفس الوقت أسعاره على قد إيدك، أهو ده اللي مش ممكن أبداً على رأي الست أم كلثوم.

لكن وبالنيابة عنك، وعلشان نخلي اللي مش ممكن يبقى ممكن، احنا في كايرو360 لفينا ودورنا ولقينا وجربنا وقيمنا كمان، وبنقدملك أفضل 6 كافيهات ممكن تستمتع فيهم بخروجه تفضل ذكرى حلوة لأجمل فالنتين ممكن تقضيه:

• مطعم وكافيه Place 2 Be: هينقلك لعالم تاني من الانبساط

المكان موجود في شارع 9 في المعادي، وبالتحديد بالقرب من محطة مترو ثكنات المعادي، هو مكان واسع وفيه قعدات مريحة جداً، وبمجرد ما بتدخل المكان بتحس إن القائمين عليه سعداء بوجودك وبيرحبوا بيك بصدق وبساطة.

البيتزا عندهم هي الطبق المميز والرئيسي، وحجمها واحد، وهو أكبر من المتوسط بشوية، يعني بتكفي فرد وتزيد كمان، وسعرها معقول، مش غالي ومش رخيصه، لكن تستحق.

لو كنت من عشاق الشيشة هتستمتع بيها في Place 2 Be جداً، وبالذات في وجود الألوان المبهجة اللي مسيطرة على المكان، واللي بتديك  إحساس بالهدوء وراحة البال.

• إيتوال الدقي .. مش بس حلواني 

الأجواء العامة في المكان مريحة، وممكن تختار شكل قعدتك، سواء على ترابيزة عادية، أو كنبة مريحة في جو حميمي، وده “إيتوال” كمطعم وكافيه ومكان تقعد فيه مش بس حلواني تشتري منه وتمشي على طول.

العصاير في “إيتوال” كلها فرش مش معلبه، وتحديداً عصير “البرتقال” مميز جدًا عندهم، ولو هتتعشى يبقى عليك وعلى كريب السوسيس،  ولو هتحلي، يبقى الجاتو وفطيرة النوتيلا المميزين جدًا.

الفطاير عمومًا عبقرية حقيقي ومشبعة، ونقدر ننصح بضمير مرتاح اللي نفسه في فطير محترم ومخدوم ويملى العين يبقى “إيتوال” على طول.

• ماندرين قويدر .. بولة واحده كفاية

لو عايز تخرج بره جو المطاعم والكافيهات وتقعد قعدة رايقة في المعادي وعلى الكورنيش، يبقى “ماندرين قويدر” المعادي، وخليك أوت أوف بوكس واضرب أيس كريم وبس، وسيبك من الأكل والشرب.

الآيس كريم في ماندرين قويدر هوه أحلى حاجه في المكان، وكمان مختلف ومميز لدرجة إنك مش هتحتاج اكتر من بولة واحدة لإن حجمها كبير فعلًا، وطعمها وهمي.

• بليز- Blaze .. هتحلي قبل الأكل

سلسلة مطاعم “بليز” حاليًا في مصر بتتكون من 3 فروع، النزهة والمهندسين، وأحدث فرع ليهم في القاهرة الجديدة، وتحديدًا في مول بوينت 90.

مساحة الـ “آوت دور” في المطعم كبيرة، وبرغم إنها آوت دور إلا إنها هادية وفيها كنب وكراسي تحس معاهم بأجواء اللاونج المريحة، في أكيد إن دور ، لكن تحس إنه صغير شوية.

من أفضل الأطباق اللي بيقدمها “بليز” هو طبق الـ “كوردن بلو” و الـ ” فاهيتا تريو” ، ولو مش جاي تاكل، يبقى تشرب ميلك شيك تشيز كيك أوريو أو فراولة، مع طبق حلو “فرينش توست بانانا” وده عبارة عن قطعتين توست وبينهم قطع موز ونوتيلا وكراميل، وعليهم بولتين آيس كريم فانيليا، وادعيلي بقى.

• جابيز .. مطعم راقي في سيتي ستارز

طبعًا هتقولي مولات في الفالنتين لأ يا عم، مش طالبه زحمة ودوشة وصوت عالي، وبعدين أكيد الأكل في مول مش هيقى مريح لكن مطعم “جابيز ” بديكوراته البسيطة المستوحاة من جو البيت اللطيف، كفيلة إنها تغير رأيك وفكرتك في الموضوع ده.

المكان مناسب جدًا لخروجة فالنتين لإنه زي ما قولنا ديكوراته شبه البيت في ألوانه وترتيبه.

أعتقد إنك ممكن تكتفي بطبق المقبلات العملاق اللي هحكيلك عنه دلوقتي، وهو عبارة عن “بتس أند ديبس Bits and Dips” وده عبارة عن بلح بحر وكريسبي بون بون وسمبوسك سجق وأجنحة دجاج سبايسي وناتشوز، ومعاه عيش من القمح الكامل وباتون ساليه وصوص جبنة.

كفاية ولا أكمل؟ طايب آخر نصيحة لو هتروح “جابيز” خلي طبق الفالنتين يكون “الشوكليت سوفليه” لإنه فعلًا “سوفليه” جدًا، الكيكة مستوية تمام ومعاها بولة آيس كريم فانيليا والشوكولاتة السايحة طالعة من قلب الكيكة ورايحة على الآيس كريم في سيمفونية من الطعم الساخن والبارد.

• هاوس أوف كوكو .. فلانتين يعني شوكلاته .. معروفة يعني

عشاق الشوكولاتة ما يعرفوش في الفلانتين غير العشق الأول “الشوكلاته” وما يقدروش يستغنوا عنها مهما حصل، ويقدروا كمان يفرقوا بين الشوكولاتة اللي تعلي المزاج والشوكولاتة الأي كلام.

في “هاوس أوف كوكو” واللي ممكن نسميه “بيت السعاده” اللي تاخدك معاها في رحلة لعالم جميل ما تفوقش منه إلا بعد ما تخلص كل جرعة الشوكولاتة اللي هتشربها أو تاكلها كاملة..

أو أنواع الشوكولاتة هناك سواء شرب زي الهوت شكوليت أو الـ chocolate spoon ولو هتجرب أكل زي الوافلز والبروانيز والمولتن كيك حاجة كده ما تتوصفش  تتاكل بس.

الأسعار معقولة جدًا مقارانة بإنك بتاكل شوكلاته سوسيري، وخاصة الـMilk chocolate spoon  اللي هو عبارة عن مكعب شوكولاتة سويسري باللبن، بيتحط مع لبن سائل ويدوب وتشرب أجمد شوكولاتة في التاريخ.

نتمنى نكون قدرنا نجمع لكم على قد ما نقدر، أفضل 5 كافيهات ومطاعم ممكن تروحوهم مع اللي بتحبوهم في الفلانتين، وكل سنة وانتم طيبين، وهابي فلانتين داي.