The Definitive Guide to Living in the Capital , Cairo , Egypt

مافيش أجمل من أنك تستمع بوقتك مع صحابك في مكان قعدته حلوة وأكله لذيذ، وطبعًا الخدمة الكويسة عامل أساسي أنك تقضي في المكان وقت لطيف، غير جودة الأكل اللي قادرة على تغيير مزاجك 180 درجة، واللي هو هدف الخروجة أصلًا. علشان كده فريق #كايرو_360 جهز لكم أفضل 10 أماكن لسنة 2016 من وجهة نظرنا، واللي استمتعنا بوقتنا فيها، وعمرنا ما هنندم أننا نعيد زيارتنا لهم تاني.

اروما لاونج – Aroma Lounge

 من الأماكن اللي ممكن تكون زحمة في بوينت 90 في التجمع، بس الحقيقة وقت زيارتنا، ماكنش فيه حاجة جربناها وطلعت وحشة سواء الباستا أو البيتزا أو العصائر، حاجة ملوكي وقعدة مبهجة.

بليز – Blaze

سواء فرعه اللي في مصر الجديدة أو التجمع  أو المهندسين كلهم فيهم نفس المواصفات، المهنية والذوق الراقي، أكيد هتلاقي طلبك وسط تنوع الأكلات عندهم ما بين ساندويتشات البرجر والوجبات السخنة الشهية ده غير الحلو اللي لا يقاوم. كمان ده مكان لطيف جدًا لو قررتم تعملوا فيه عيد ميلاد مش هتندموا.

باتو-  Battaw

أكل مصري من اللي قلبك يحبه في هليوبوليس، أصناف متنوعة بتغيير بسيط في المكونات، أول مرة نشوف حد بيجدد في الأكل بالحلاوة دي، أكيد مش هتندموا لما تجربوه.

فروزي تويست – Frozzy Twist

من أفضل الأماكن اللي ممكن تأكل فيها آيس كريم رولز في مصر، مافيش أجمل من مكونات الآيس كريم اللي بيضيفوها، سواء آيس كريم بالتشيز كيك او بالبسبوسة أو بالتفاح، مش هتقدر تقاوم جمال طعمه خاصة أنه بيتحضر قدامك وتقدر تضيف عليه كل المكونات اللي تحبها.

باتراهاف أند كو – Batter Half &co

من أحسن أماكن صناعة الحلويات بمختلف أنواعها واللي مش بس بتوفر لك كيك عيد ميلاد أو لأي مناسبة أنت محتاجها في وقت قصير، لأ كمان طعمها حكاية سواء في الحلويات الغربية أو الشرقية في رمضان.

جوز تشكوليت بار- Joe’s Chocolate Bar

لو عاوز مكان تنبهر بيه بكل حاجة بتعملها، خاصة الكريب والوافل يبقى عليك بجوز تشكوليت بار. يبقى لازم تروح هناك، لأن مش أي حد يقدر يعمل حلويات بالإتقان ده.

ديب أند ديب-  Dip n’ Dip

أول مكان لمدمني الشوكولاتة واللي لسه محافظ على مستواه وفتح أكتر من فرع في أماكن كتير زي التجمع ومدينة نصر، وده طبعًا لو عاوز تكرم حد من صحابك في عيد ميلاده، يبقى تاخده وتروح على هناك، علشان يستمتع بأجمل طعم شوكولاتة بليجيكي ما تتنسيش.

قهوة-   Kahwa

من الأماكن اللي تستمتع بها بأحلى فطار في 6 أكتوبر، فطار زي ما الكتاب بيقول متنوع، ويشبع وطعمه حلو. صحيح مش شرط تكون وجبات الغداء بنفس الجودة، بس الأكيد أنك هتستمتع مع صحابك هناك.

برو أند شو- Brew and Chew

مملكة الشوكولاتة القاتلة، برو أند شو في المعادي أثبت لنا أن ممكن أي حد يفتح محل حلويات، بس مش أي حد يقدر يبهر زباينه بالجديد اللي بيقدمه، وده اللي عمله برو أند شو من أول ما فتح في إسكدنرية ولحد دلوقتي، وكل أطباقه الحلوة تشهد يده، كمان هم بيقدموا أكلات عادية زي البرجر والمكرونة والأطباق المختلفة، غسر لمسة الجنان في اطباقهم اللي بنحبها زي المكرونة بصوص الشوكولاتة والبرجر المحشي شوكولاتة برضه. من الآخر المكان ده بتاع عشاق الشوكولاتة ومن أفخم الأنواع.

اسبريسو لاب- Espresso Lab

عشاق القهوة بتعتبرهم أصحاب مزاج، ومش سهل أنك ترضي حد صاحب مزاج عالي بس إسبريسو لاب في المعادي قدر يعمل ده بحرفية عالية، لأنه عامل معمل لعشاق القعوة والمشروبات المتنوعة، يعني أنك ممكن تشرب أي حاجة يتحبها وتكون معمولة بطريقة تجننك من حلاوتها وتستمتع جنبها بأنك تاكل حاجة خفيفة حلوة برضه.