5 أسباب هتعرفك إحنا ليه منتظرين مسلسل “فلاش” بكل الحماس ده
أعمال شاهد المؤسسة العربية الحديثة خالد الصفتي فلاش كارتون فلاش مسلسل فلاش
Cairo 360
مافيش شك أن الأخبار الاقتصادية والسياسية والاجتماعية الفترة الأخيرة، كفيلة أنها تخللي دماغ أي واحد تلف، وتجبرنا نقضي ساعات على السوشيال ميديا نتابع كل جديد في الملفات دي.. لكننا مستعدين نتراهن معاكم كلكم أنكم لو سألتم أي حد من مواليد الثمانينيات على الخبر الأهم اللي سمعه الأيام اللي فاتت هيكون خبر تحويل سلسلة (فلاش) لمسلسل من إنتاج منصة شاهد، هو الخبر الأهم بالنسبة له.. تعالوا نعرف ليه.
1. يانوستالجيا يا!
مواليد الثمانينيات كانت تسليتهم الوحيدة تقريبًا هي قراءة سلسلة روايات تابعه لمشروع عبقري أسمه (روايات مصرية للجيب)، صدر عن دار نشر (المؤسسة العربية الحديثة) قدمت للقراء سلاسل بأهمية وقيمة (رجل المستحيل) و (ملف المستقبل) و (ما وراء الطبيعة) ومن ضمن السلاسل دي، كانت سلسلة (فلاش) للكاتب ورسام الكاريكاتير خالد الصفتي.
تحويل السلسلة لمسلسل في رمضان على شاهد، بيرجع آلاف الأطفال (اللي سنهم حوالي ٣٥ سنه دلوقت) لحالة من النوستالجيا اللي مخليانا بنعد الأيام علشان نشوف المسلسل.
2. انتصار كبير في زمن الهزائم الكبيرة
إحنا الجيل اللي عايش الوباء والحرب الشبه عالمية، مرينا بانكسارات كتير وأفراح قليلة. حتى بعض كُتاب المؤسسة العربية الحديثة اللي عيشنا معاهم طفولتنا ومراهقتنا رحلوا في أعمار مبكرة نسبيًا، وما شافوش السلاسل اللي تعبوا في تأليفها وهي بتتحول لأعمال على الشاشة. لكن خالد الصفتي صاحب سلسلة فلاش هو أول كاتب من المؤسسة يشوف السلسلة بتاعته وهي بتتحول لعمل تليفزيوني قدام عينيه (ربنا يمد في عمره وصحته).. ده انتصار لا يستهان بيه في زمن أصبحت الانتصارات فيه قليلة.
3. إنتاج محترم في توقيت عظيم
إحنا مش مستنيين مجرد عمل كارتون تقليدي بميزانية قليلة. لما بنتكلم عن أعمال شاهد بنتكلم عن ميزانية ضخمة، واهتمام بكل تفصيلة في الإنتاج. يعني إحنا في انتظار عمل بيحترم دماغنا ومش بيقدم مجرد تسلية أو كوميديا فارغة. إحنا مننظرين عمل ممتع ومسلي على صعيد الصورة والتحريك وباقي عناصر العمل الفني. كل ده مع ثقتنا في شغل أستاذ خالد. اللي اتربينا عليه. تخلينا بنعد الأيام علشان نشوف الحلقة الأولى.
4. المواطن المطحون!
لو كنتم من متابعين سلسلة فلاش، هتبقوا عارفين شخصية المواطن المطحون اللي كل قراء السلسلة بيحبوه ويعتبروه شخصيتهم المفضلة. واللي قدر خالد الصفتي يعبر عنها على شكل راجل رفيع وبيعاني من نقص التغذية لدرجة أنه تحول لهيكل عظمي! شخصية المواطن المطحون تعتبر تصوير كاريكاتيري للشخص اللي تعبان ماديا في حياته وبيعاني بشكل يومي، لكن بشكل كوميدي في نفس الوقت. دي واحدة من أهم الشخصيات اللي كلنا منتظرينها بشغف.
5. مناسب للجميع
مسلسل فلاش هيكون مناسب لكل أفراد الأسرة، ومشاهدته في رمضان هاترجع لنا ذكريات البرامج الكارتونيه العظيمة اللي اتربينا عليها، زي بكار و سلاحف النينجا والسندباد وغيرها. لكن المرة دي هنشوفها بتطويرات ضخمة، وهانشوفها مع أولادنا. في رأينا أن مسلسل (فلاش) هيكون أحلى مسلسل كارتون يجمع أفراد الأسرة كلها في مكان واحد… استنونا علشان نعمل لكم مراجعة للمسلسل لما يتم عرضه. ورمضان كريم!
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
