The Definitive Guide to Living in the Capital , Cairo , Egypt

يوم 23 مارس من سنة 1870م، كان يوم مميز على القاهرة وناسها، في اليوم ده أنشئت دار الكتب في القاهرة، وتم إنشاؤها في عصر الخديوي إسماعيل، واللي بتعتبر من أقدم المكتبات الوطنية في العالم. بالمناسبة دي هنعرفكم أكتر على المكان التاريخي العظيم ده.

1 – دار الكتب وقت تأسيسها كان اسمها “الكتبخانة الخديوية المصرية”، وكانت موجودة في الطابق الأرضي بسراي الأمير مصطفى فاضل شقيق الخديوي إسماعيل، وأنشئت الدار بهدف الإشراف على مشروع لإحياء الآداب العربية، إضافة لجمع المخطوطات اللي ليها قيمة كبيرة م الوثائق اللي احتفظ به السلاطين والأمراء والعلماء والمؤلفين في المساجد والأضرحة ومعاهد العلم.

2 – مع زيادة عدد محتويات الدار، كان لازم تكون أوسع، وعلشان كده اتنقلت سنة 1903 للمبنى الجديد في ميدان “باب الخلق” في منطقة السيدة زينب بوسط القاهرة، واللي أنشئ مخصوص لدار الكتب ودار الآثار العربية، وافتتح في بداية سنة 1904.

3 – بتحتوي الدار على حوالي 57 ألف مخطوطة بتعد من أهم وأقيم المجموعات، وهي مرقمة ومفهرسة وبتغطي تشكيلة واسعة من الموضوعات، وبتضم مجموعة نادرة من أوراق البردي العربية منها عقود زواج وبيع وإيجار واستبدال وكشوف وسجلات وحسابات خاصة بالضرائب أو تقسيم مواريث وغيرها، وبيرجع أقدمها لسنة 87 هجريًا (705 ميلاديًا).

4 – بتحتوي الدار كمان على مجموعة من الوثائق الرسمية التاريخية زي حجج الوقف ووثائق الوزارات المختلفة وسجلات المحاكم وغيرها، إضافة إلى مجموعة نماذج من النقود العربية بيرجع أقدمها لسنة 77 هجريًا (696 ميلاديًا)، ده غير المكتبات المهداة للدار واللي بتمتاز بأصالتها وندرة محتوياتها، وبتشمل مجموعاتها تشكيلة كبيرة من مخطوطات القرآن المكتوبة على الورق والجلد وبعضها في الخط الكوفي القديم غير المنقط وبعضها لخطاطين مشهورين.

5 – في 23 يوليو سنة 1961 تم وضـع حجر الأساس لمبناها الجديد الحالي على كورنيش النيل، وبدأ الانتقال للمبنى الجديد تدريجيًا ابتداء من سنة 1971.

6 – اتغير اسمها على مر الزمن، وكان اسمها عند نشأتها سنة 1870 “الكتبخانة الخديوية”، وبعدها “دار الكتب الخديوية” (1892- 1914)، وبعدها “دار الكتب السلطانية” (1914– 1922)، وبعدها “دار الكتب الملكية” ( 1922- 1927)، وبعدها دار الكتب المصرية (1927- 1966)، ثم “دار الكتب والوثائق القومية” (1966- 1971)، ثم “الهيئة المصرية العامة للكتاب” (1971- 1993)، وأخيرًا أصبح اسمها “الهيئة العامة لدار الكتب والوثائق القومية” من سنة 1993 ولحد النهارده.

لو نفسك تزور دار الكتب

العنوان: 121 كورنيش النيل، بولاق، محافظة القاهرة.

التليفون: 0225750886.