The Definitive Guide to Living in the Capital , Cairo , Egypt

بدأ موسم الصيف، والصيف يعني الإسكندرية والبحر والمصيف، وطالما جبنا سيرة الإسكندرية، يبقى أكيد لازم نعدي على مكتبة الإسكندرية وفنونها وجمالها، وعلشان كده حبينا نفكركم بافتتاح الدورة الـ 14 لمعرض “أول مرة” في مكتبة الإسكندرية يوم الخميس الجاي، واللي هيكون في قاعة المعارض الشرقية في مركز مؤتمرات مكتبة الإسكندرية.

المعرض بيجمع عدد كبير من شباب الفنانين والفنانات الواعدين في المراحل الأولى من مشوارهم الفني؛ وبدأت شخصيتهم الفنية المتفردة تظهر وتاخد شكل خاص، ده غير إن مشاركتهم في المعرض ده هتكون المشاركة الأولى ليهم في معرض فردي، وبالتالي هيكون عرض أعمالهم من خلال معرض “أول مرة” كإنه أول معرض فردي خاص بكل واحد فيهم.

مكتبة الإسكندرية أعلنت عن مشاركات مهمة وبارزة للفنانات المصريات الشابات في الدورة دي، وهتضم 9 فنانات من أصل 14 فنان مشارك في المعرض، وهم: إبراهيم عبد الهادي، أحمد الزلباني، إسراء كاظم، أميرة سعد، دينا نور الدين، رشا سالم، عبد الرحمن محمود، كريم رأفت، ماري جرجس، محمد عيد، ميران سمير، ميسون الزربة، هدى رجاء، ووئام علي.

وبخصوص الأعمال المعروضة وطريقة عرضها، المكتبة أكدت على إظهار الأعمال بشكل يوضح تجربة الفنان المشارك بشكل متكامل؛ بحيث يقدر المشاهد إنه يحس بالحالة الخاصة اللي بتعبر عن توجه الفنان، وإنه مش مجرد أعمال فنية لفنان.

هيستمر المعرض لحد يوم 15 يوليو الجاي، وهيفتح أبوابه قدام الجمهور والزوار يوميًا من الساعة 9 الصبح للساعة 9 بالليل، ما عدا أيام الجمعة والسبت من الساعة 11 الصبح لـ 7 بالليل.