The Definitive Guide to Living in the Capital , Cairo , Egypt

من 3 سنين فاتوا، الروائية والمترجمة الأكاديمية مي التلمساني، قررت تعمل “معتكف كتابي”، وده بعد ما اشترت بيت مخصوص في طريق مصر الإسكندرية الصحراوي بهدف تحويله لمتحف يضم مكتبة والدها المخرج عبدالقادر التلمساني، وكمان مكتبتها الخاصة هي وزوجها، ومعاهم مكتبة المستشرق الكبير إدوار الخراط.

البيت ده هيكون متخصص في استقبال المهتمين بالكتابة الإبداعية والنقدية والترجمة وغيرها.

وهيتم الافتتاح الرسمي لـ”بيت التلمساني”، بحضور الرموز الثقافية والإبداعية بعد انتهاء أزمة فيروس “كورونا” المستجد المنتشر حول العالم، وخلال السطور الجاية هنقول لكم على 7 معلومات مهمة عن البيت ده.

1- بيت التلمساني هدفه توفير مكان للمبدعين والكتاب بعيدًا عن الضوضاء في القاهرة.

2- البيت مبني على التراث الريفي المميز، وبيحيط بيه عشرات الأفدنة المزروعة علشان يمنح الكتاب فرصة للتمتع بالهدوء التام.

3- أقل مدة هيستقبل فيها “بيت التلمساني” الكتاب والمبدعين هي أسبوعين، وأقصى مدة هتكون 4 أسابيع، وهيتم استقابلهم كل سنة بداية من يناير حتى يونيو.

4- هيتوفر للكتاب كل سبل الراحة زي الإنترنت والوجبات والمشروبات.

5- يشترط في اللي هيطلبوا الإقامة في البيت أن يكون عندهم مشروع للكتابة في مجالات (الرواية، القصة، الشعر، المسرح، السيناريو، الترجمة الأدبية، النقد الأدبي)، وكمان لازم يكون فيه كتب نشرت من قبل لكل اللي هيقدموا للإقامة في البيت.

6- البيت بيمنع اصطحاب أفراد الأسرة وكمان ممنوع الزيارات فيه، وهو بيتكفل بتوفير وسيلة مواصلات من القاهرة للبيت ذهاب وعودة.

7- ومن ضمن أهداف “بيت التلمساني” دعم الإبداع ووجود مكان مناسب يلتقي فيه الكتاب، والتشجيع على التأمل وتبادل الخبرات.

وعلشان تعرفوا أكتر عن بيت التلمساني، تقدروا تزوروا صفحتهم على الفيسبوك من هنا.