The Definitive Guide to Living in the Capital , Cairo , Egypt

فيه فرق بين المهارة والإبداع، ممكن جدًا يكون عندك مهارة في حاجة، لكن مش شرط تكون مبدع فيها، فمثلًا كل لعيبة الكورة عندهم مهارات رياضية، لكن مش كلهم “مو صلاح”.. علشان كده بنشوف كتير من الفنانين بيمتلكوا مهارات في الفنون المختلفة اللي بيمارسوها، لكن الفنانيين المبدعين واللي شغلهم بيتكلم عنهم قليليين، وده بالضبط اللي بينطبق على الفنان النحات “هاني جمال”.. اللي حقيقي شغله بيتكلم عنه، وكل أعماله مش بس فيها مهاراة وموهبة، لكن فيها إبداع ماحدش يقدر ينكره.

هاني فنان صعيدي من مواليد محافظة المنيا، ودخل كلية فنون جميلة في جامعة المنيا، واتخصص في قسم النحت لحد ما اتخرج من الكلية سنة 2008.. وبعد تخرجه، بدأ هاني يشتغل في بعض الأعمال التجارية زي الديكورات، وبعد 10 سنين، وتحديدًا في نوفمبر 2018 عمل أول إنتاج فني خاص به، وكان تمثال للعالمي “محمد صلاح”.. وهنا ييجي دور الإبداع، اللي كان سبب رئيسي في إن التمثال يوصل فعلًا لمحمد صلاح ويعرضه في واحد من الإعلانات التجارية، وبعدها يبعت صلاح رسالة لهاني بخط إيده بيشكره فيها على التمثال، وبيقوله إنه حاطه مع مجموعة من أقيم وأغلى الجوائز اللي حصل عليها خلال مسيرته الرياضية.

من هنا كانت بداية إبداع هاني في النحت، وعمل بعدها تمثال للدكتور السير مجدي يعقوب، وبعدها سافر في رحلة عبر الزمن، علشان يرجع لنا بمجموعة تماثيل لعمالقة الزمن الجميل زي “النقشبندي” و”محمد فوزي” و”صلاح جاهين”، وغيرهم.

اختيار هاني للعمالقة دول ماكانش من فراغ، وإنما لإنه في الأتيليه بتاعه كان دايمًا بيشغل الراديو، فكان أصدقائه في رحلة الإلهام هم العمالقة دول، ودليله في الرحلة دي هو صوتهم، وكهدية منه حب يخلد ذكراهم بفنه.

سألنا هاني عن المدة اللي بيحتاجها العمل علشان نشوفه بالشكل النهائي البديع ده، فقالنا إنه بيحتاج في المتوسط شهر، وده بيتوقف على مجموعة عوامل، منها حالته النفسية والمزاجية، وعلى حسب كمان التفاصيل المتاحة عن الشخصية، هل هينحتها من صورة ولا من فيديو ولا هتكون أمامه بشكل حقيقي.

معظم أعمال هاني بتبقى من سبيكة البرونز واللي هي عبارة عن خليط من النحاس ومجموعة من المعادن، وطبعًا بيمر بمراحل طويلة بتبدأ بالطين الأسواني، والقوالب والصب والتشكيل لحد ما نوصل للشكل النهائي المصنوع من البرونز.

بيتمنى هاني هي إن الدولة تستغل الفنانين ورؤيتهم في تزيين وتطوير وتجميل الشوارع والميادين على مستوى الجمهورية.