The Definitive Guide to Living in the Capital , Cairo , Egypt

مافيش شك أن تجسيد الفنان ياسر جلال لشخصية الرئيس المصري عبد الفتاح السيسي عمل حالة من الجدل في المجتمع المصري، وده من أول لحظة لبداية عرض مسلسل الاختيار3. لكن الحقيقة أن دي مش أول مرة نشوف الرئيس المصري في أعمال فنية. تعالوا نشوف أشهر ٥ أعمال تناولت سيرة رئيس مصر.

سيرة ومسيرة
من الأعمال القليلة اللي مش بيتم تسليط الضوء عليها بقوة، على الرغم من أنه مسلسل بيتناول حياة الرئيس السابق مبارك، يمكن بسبب أنه مسلسل إذاعي مش تليفزيوني.
سيرة ومسيرة للمؤلف أيمن سلامة وإخراج محمد مشعل، وقام ببطولته الفنان الراحل نور الشريف واتقدم إذاعيًا سنة 2001.
المسلسل بيحكي سيرة الرئيس مبارك، وزواجه من سوزان مبارك (قامت بالدور الفنانة ميرفت أمين) وترقيه في المناصب لحد ما وصل لمنصب رئيس الجمهورية، وبيكمل معانا المسلسل لحد حادث محاولة اغتيال أديس أبابا الشهير.
في تصريحات صحفية بعد إذاعة المسلسل، نور الشريف قال أن العمل كان يعتبر مسودة تحضيرية لعمل تليفزيوني بيتم تحضيره، عن حياة مبارك، لكن العمل ده ما شافش النور.

طباخ الرئيس
مستحيل نتكلم عن فيلم بيظهر فيه رئيس الجمهورية، من غير ما ييجي على بالنا (طباخ الرئيس) اللي تم إنتاجه سنة 2008 وقام ببطولته طلعت زكريا – الله يرحمه- وداليا مصطفى، وقام بدور الرئيس الفنان خالد زكي. الفيلم من تأليف يوسف معاطي وإخراج سعيد حامد.

الفيلم أتصور في عصر الرئيس مبارك، لكن لم تتم الإشارة له بشكل مباشر في الأحداث، على العكس من مسلسل الاختيار3 اللي تم تسمية الرئيس السيسي باسمه ورتبه العسكرية. لكن كان فيه إشارات كتير – غالبها كوميدية – عن شخصية الرئيس مبارك.

المشخصاتي الجزء الثاني
اشتهر الفنان تامر عبد المنعم بتقديم شخصية (شلبي) أو المشخصاتي.. الشاب المُهمش اللي بيحاول يكسب شوية فلوس من خلال موهبة تقليد المشاهير.. الجزء الأول من الفيلم أتقدم سنة 2003 وقلد تامر من خلاله نجوم بحجم عادل امام، عمرو دياب، أحمد زكي، محمد فؤاد، وغيرهم. وفي 2016 قرر تقديم الجزء التاني من الفيلم، لكن المرة دي من خلال تقديم شخصيات سياسية، على رأسها محمد مرسي، واللي تم تناوله باسمه وشخصه، هو وسلسلة طويلة من الشخصيات اللي لعبت دور محوري في الحياة السياسية المصرية في الفترة دي.

المشخصاتي 2 تم إنتاجه وتقديمه في فترة حرجة من تاريخ مصر، بالتالي ما أخدش اهتمام كبير رغم جرأة طرحه و(توثيقه) لأيام درامية في الحياة السياسية المصرية.

ناصر 56 وأيام السادات
طبعًا مانقدرش ننسى في النهاية فيلمين من أحلى وأهم الأفلام اللي تناولت سيرة حياة الرؤساء، وهي أفلام ناصر 56 وأيام السادات، واللي قام ببطولتهم الفنان أحمد زكي، واللي يُحسب له ويُحسب لتاريخه أنه أدى شخصيتين لرئيسين مصريين مختلفين جدًا من حيث الشكل الخارجي وطريقة الكلام والتعامل، وفي كلا الشخصيتين أقنعنا زكي بالأداء لدرجة أننا لما بنتكلم عن واحد من الرؤساء دي بييجي في بالنا شكل أحمد زكي وهو بيقدم شخصياتهم علطول.
سلسلة الأفلام دي شجعت أحمد زكي على تقمص شخصية الفنان عبد الحليم حافظ في آخر أفلامه اللي قدمه في 2006 وهو (حليم).

الاختيار 3
أما أهم ما يميز (الاختيار 3) أنه بيقدم شخصية رئيس حالي لمصر، وهو السيسي، وده أكيد كان تحدي كبير لصناع المسلسل، خاصة أن الأجزاء السابقة من الاختيار عودتنا على الجرأة في الطرح وكشف خبايا عن أيام صعبة في حياتنا.. مش هنتكلم كتير عن الاختيار هنا، لإننا هنستعرض الموضوع بشكل مفصل في مراجعتنا لـ (الاختيار3) اللي هايتنشر على كايرو 360 في الأيام المقبلة.