The Definitive Guide to Living in the Capital , Cairo , Egypt

معرض القاهرة الدولي للكتاب هو أهم فاعلية أدبية وثقافية في مصر، ومنذ انطلاقه من 55 سنة وهو كل سنة بيزيد أهمية عن اللي قبلها، وبيساهم بشكل مباشر في زيادة الثقافة والوعي لكل الناس، وكل سنة بيضم مجموعة كبيرة من دور النشر سواء محلية أو عالمية، والسنة دي المعرض هينطلق من يوم 24 يناير وحتى 6 فبراير في مركز مصر للمؤتمرات الدولية بالقاهرة الجديدة، وعلشان نسهل عليكم الوصول هنقولكم على طرق الوصول لمعرض القاهرة للكتاب 2024 سواء معاكم عربية أو هتروحوا مواصلات.

أولًا في الوقت ده بيكون فيه خطوط سير مخصصة للمواصلات العامة من كل الميادين الرئيسية للمعرض والعكس، وده لكثر مريدينه واللي السنة دي مش هيقل عن 4 مليون زائر نسبة لأعداد زوار العام الماضي والزيادة السنوية المتوقعة.

وتقدروا تروحوا معرض القاهرة للكتاب 2024 من خلال السيارة من مكانكم بأنكم تاخدوا طريق المشير طنطاوي، ومن بعده المحور، وهتوصلوا بسهولة لمعرض الكتاب.

أما الأتوبيسات الخاصة بهيئة النقل العام والشركات الخاصة “ميني باص”، فهتقدروا تركبوا من الميادين والشوارع الرئيسية في القاهرة الكبرى زي “عبد المنعم رياض – شارع رمسيس – العباسية – جامعة الأزهر – النزهة الجديدة – ميدان الحجاز – السبع عمارات – مكرم عبيد – مصطفى النحاس – المنهل – الوفاء والأمل – دوارن شبرا – شارع شبرا – أحمد حلمي – نادي السكة.

كمان تقدروا تركبوا الأتوبيسات والميني باص من مناطق الأميرية – ميدان المطرية – الحلمية – كلية البنات – عين شمس – ميدان الشهيد بركات – الحي السابع – حي السفارات – ميدان الجيزة – جامعة القاهرة – القصر العيني – السيدة عائشة – الأتوستراد – صقر قريش – كارفور المعادي – نادي وادي دجلة – الطريق الدائري – محور المشير – المظلات – سراي القبة – روكسي – السبع عمارات – الحي الثامن – الوفاء والأمل.

أما الميكروباصات فالمتوفر منه رسميًا للوصول لمعرض القاهرة الدولي للكتاب 2024 حتى الآن 3 خطوط وزي ما قلنا قبل كده لأهمية الحدث هتلقوا خطوط من كل ميادين مصر لمعرض الكتاب، والخط الأول هيكون من ميدان عبد المنعم رياض والثاني من دوران شبرا، والثالث من النزهة الجديدة، وزي كل سنة هيكون فيه من المنيب والسيدة عائشة والجيزة والدقي ومصر الجديدة ومدينة نصر وعين شمس وعرب المعادي وغيرهم ولكن بشكل غير رسمي.

استمتعوا بمعرض القاهرة الدولي للكتاب 2024 واشتروا أكبر قدر ممكن من احتياجاتكم ومتنسوش تحضروا الندوات وورش العمل وحفلات توقيع الكتب.