مكتبة الجامعة الأمريكية بالتحرير.. كنز حقيقي في وسط القاهرة
شروط الاشتراك في مكتبة الجامعة الأمريكية عنوان مكتبة الجامعة الأمريكية مكتبات القاهرة مكتبات في وسط البلد مكتبة الجامعة الأمريكية
Cairo 360
بدون أي تفكير، مكتبة الجامعة الأمريكية بالقاهرة، تعتبر واحدة من أرقى وأحسن المكتبات في القاهرة، من حيث الشكل والمضمون. وبالرغم من أن موقعها داخل الحرم الجامعي، فهي مع ذلك متاحة للجميع، مش بس لطلبة الجامعة أو العاملين بها. كل اللي محتاجه علشان توصل لها هو بطاقتك الشخصية، وفرد الأمن هيسمح لك بالدخول بمنتهى البساطة.
صحيح المكان يستاهل كل الاحتياط الأمني المفروض عليه، لأن المكان يختلف كثير عن الجو الخارجي المعروف لمنطقة وسط البلد، لكن في الحرم نفسه المكان هاديء والخضرة في كل مكان مع وجود مقاعد خشبية للجلوس، أما في المبنى نفسه فالصمت هو سيد الموقف، وكل اللي في المبنى محترمين قعدة الصمت دي.
مش هنكذب عليكم، أسعار الكتب تعتبر غالية جدًا، صادفنا هناك كتب بأرقام كبيرة! إحنا فاهمين قيمة الكتب دي كويس، لكن كنا نتمنى تكون مدعمة علشان الطلاب والباحثين.
عدد الكتب كبير، ومعظمه مرتبط بالأقسام العلمية في الجامعة الأمريكية، ولكن ده ما يمنعش أنها منظمة ومرتبة بترتيب واضح وسهل في عملية البحث، من ضمن الأقسام دي: كتب تعليم اللغة العربية، والدراما والشعر، والكتب الكلاسيكية، والأخير لاقينا فيه مجموعة كبيرة لكتب شكسبير، وهيمنجواي وتشارلز ديكنز.
قسم الأطفال مش كبير، ولكن ده ما يمنعش أن فيه عناية كبيرة به، وكعادة أي حاجة متعلقة بالطفولة لاقينا كتب مجسمة ألوانها مبهجة ومغرية جدًا حتى لمجرد الفرجة.
أجمل حاجة أنك ممكن تأخذ وقتك في البحث على اللي أنت عاوزه في هدوء تام، أو أنك تسحب كتاب وتأخذ فكرة عامة عنه في منطقة مخصصة للجلوس في آخر المكتبة، ده غير أنك لو محتاج مساعدة أو عندك استفسار هتلاقي فريق عمل يدلك ويساعدك.
إزاي توصل للمكتبة؟
العنوان: 113 شارع القصر العيني، مدخل ميدان التحرير.
أقرب محطة مترو: المكتبة ملاصقة لمحطة مترو السادات.
التليفون: 0227975370.
