مشروع كورال: الغُنا من قلب كايرو
Zainab Magdy
“ورشة حيث العمل متعة، مصدر حيوية، وتجربة تحدّي”. هو ده
الشعار بتاع «مشروع كورال»، بـ يعبر عن الحقيقة زيه زي أغانيهم بالظبط. مشروع
كورال بقاله 10 شهور بـ يقدم عروض في كذا مكان في القاهرة، وطول الفترة دي كانوا
بـ ينشروا المتعة لكل الناس اللي بـ تسمعهم. بعد كل عرض ليهم بـ تلاقي تدفق غير
طبيعي لطاقة إيجابية جداً من الجمهور بـ تخليهم دايماً يحضروا لهم عروض تاني
وتالت.
في شهر مايو 2010، مشروع
كورال قدم عرض اسمه ’كورال شكاوي القاهرة‘ لمئات من الجماهير في ساحة مصنع مسرح
روابط (Factory Space) . ومن وقتها مجموعة الكورال إبتدت تكبر أكتر من ناحية
الأعضاء، المشاريع، وحتى الجماهير. نجاح وشعبية مجموعة الكورال غالباً بـ يبقى
سببه إنهم بـ يعرضوا مشاكل الناس من خلال أغانيهم.
كورال شكاوي القاهرة طلع
من مشروع عالمي بـ يقدم شكاوي الناس في صورة أغاني بدل ما يفضلوا يتذمروا كده
وخلاص. وعن طريق الإنترنت، إتبعت دعوة بالمشاركة لشباب كتير من بيئات ومهن مختلفة
عشان يحضروا ورشة لمدة إسبوع، شباب عندهم خلفية فنية بسيطة جداً أو حتى من غير
خلفية فنية خالص، وفي الورشة دي إتعلموا إزاي يخلقوا الأغاني من شكاويهم وإتمرنوا
على العرض كمان. والورشة دي أثمرت عن تقديم عرض عن أحوال مصر بوجهة نظر شخصية
وإجتماعية خاصة بالكورال ومدته كانت 15 دقيقة، ومن هنا إتولد «مشروع كورال».
فيه مشاريع تانية إتعملت
من ورش مشابهة. المشروع اللي بعده على طول كان ’كورال الإعلانات‘، وده إبتدى في
الأول كورشة لعمل كورال عن الإعلانات اللي بـ تأثر في مجتمعنا، لكن بعد كده
الموضوع إتطور وطلع منه كورال بـ يغني عن مجموعة مخاوف إجتماعية. المجموعة قدمت
مشروع الكورال ده في مركز الجزويت الثقافي في الإسكندرية. أما المشروع اللي بعده
كان بالتعاون مع مركز ثقافي في الجمالية، واشترك فيه شباب المنطقة وكتبوا أغانيهم
بنفسهم وإتكلموا فيها عن حياتهم اليومية.
المشروع الرابع كان ’كورال
الأمثال الشعبية‘، وده كان عبارة عن ورشة لعمل أغاني من الأمثال الشعبية
التقليدية. الكورال إختار أمثال شعبية بـ تعبر عن حياتهم وبـ تمثل حالة المجتمع
المصري دلوقتي، وكان فيه أغنية منهم كانت بـ تبتدي بالمثل الشعبي الشهير اللي بـ
يقول: “يا فرعون إيه فرعنك؟ قال: مالاقيتش حد يلمني”.
أما آخر مشروع ليهم كان
اسمه ’كورال يوتوﭙيا‘، والكورال ده إتعمل لأول مرة على مسرح روابط. فيديو الپرومو
اللي كان معمول لكورال يوتوﭙيا عشان يطالب بمشاركين عشان يخلقوا يوتوپيا في مدينة
(طِيبة) ومصر بالشكل اللي كلنا نحب نشوفه. الورشة استمرت لمدة 5 أيام وضمت للكورال
مغنيين وموسيقيين أكتر.
لو دخلتم على قناة يوتيوب Youtube بتاعة مشروع كورال، هـ تلاقوا إن فيه ڨيديو لأغنية
من بتوع كورال يوتوپيا مشهورة قوي ومتشافة آلاف المرات. الجمهور دايماً بـ يطلب الأغنية
ديه بالذات مرة تانية وتالتة كل ما يغنوها. أغنية ’حياة الميدان‘ عبارة عن رؤية
للحياة من جوة ميدان التحرير خلال فترة مظاهرات 25 يناير في مصر. هي نداء لإستمرار
المجتمع المتحضر ده، المجتمع اللي كان فيه ناس قليلة جداً بس هما اللي مقتنعين إن
المصريين يقدروا يعملوا كده. الكورال بـ يغني ويقول “الشعب يريد حياة
الميدان”، والجماهير معاهم!
«مشروع كورال» سافروا
لعمان في الأردن، وعملوا هناك ورشة. “مشروع كورال يقدر يعمل شبكة في الوطن
العربي بأغنية. حصلت في عمان، يبقى ممكن تحصل في الوطن العربي كله.” ده كلام سلام
يسري مؤسس فرقة الطمي المسرحية ومؤسس مشروع كورال. “بدل ما تبقى 50 واحد في
القاهرة بس، تبقى 2000 واحد في العالم كله، وساعتها هـ تبقى أغنية واحدة هي الصلة
الكبيرة بينا”.
مشروع كورال مفتوح لأي حد
حابب إنه يشارك ويقضي وقت يبدع فيه في حاجة مهمة وتستاهل. المشتركين مش محتاجين
يبقى عندهم خبرة في المزيكا، كل اللي محتاجه عشان تنضم ليهم هو إنك تروح، تتحمس،
وتغني من قلبك.
النهضة الثقافي، ومركز الجيزويت وضمن مهرجان «الفن ميدان» اللي بـ يتنظم في ميدان
عابدين، وفي مركز درب 17 18 الثقافي. لو عايز تعرف أكتر عن حفلات مشروع كورال اللي
جايه، يبقى خليك متابع معانا صفحة أجندة كايرو 360.
