مسجد السيدة نفيسة: أم العواجز ونفيسة العلم
Ahmed Abd El Gawad
قالوا لنا وإحنا رايحين نزور مقام السيدة نفيسة أنها
نفيسة العلم وأنها أم العواجز، بصوا الموضوع كبير لأن السيدة نفيسة لها مثلاً 19
لقب مختلف وكل لقب له قصة وحكاية أو معنى بـ يدل عليه، خليكوا معانا النهاردة فى
حكاية مسجد السيدة نفيسة، المسجد موجود قرب منطقة السيدة عائشة، وهى منطقة تتميز
بمساجد آل البيت والمساجد الأثرية زى مسجد بن طولون ومسجد الإمام الشافعى وغيرهم
الكثير، صعب نقول لكم المسجد مبنى على أى طريقة لأن الموضوع حصل فيه شوية تطورات،
عموما هـ نحكى لكم.
فى الأول كان المكان عبارة عن بيت قديم وواسع عايشة فيه
السيدة نفيسة بـ تعبد ربها، وتتقرب له ولما توفاها الله دُفنت فى بيتها، وبدأ
الناس يزوروا قبرها، وفى سنة 482 هـ كان حاكم مصر هو عبيد الله بن السرى بن الحكم،
وده أول واحد يبنى فوق قبرها مقام، وزادت الناس اللى بـ تزور القبر والمقام، فأمر
الخليفة الحافظ لدين الله في سنة 532 هـ بتجديد المكان، وبالتالى تم تجديد المكان
ثاني، وفى سنة 714 هـ أمر الناصر محمد بن قلاوون بعمل مسجد جنب المقام، فـ تداخلت
الحاجات كلها مع بعض، وبعدين حصل حريق كبير سنة 1310 هـ وغير فى ملامح المسجد فأمر
الخديوى عباس باشا الثانى بإعادة البناء، ودى طبعًا رحلة طويلة شوية لكنها فى
النهاية خرجت لنا المسجد بشكله غير النمطى، أو غير العادى اللى إحنا بـ نشوفه دلوقتى.
المسجد فيه حالة من الحب هـ تسيطر عليك لما تروحه، وده
طبعًا شعور ما تعرفش إيه سببه، أو يمكن شعور عندنا إحنا لما روحنا هناك علشان نحكى
لكم عن المسجد وعن قبته العالية وحوائطه اللى فيها مزركشات كثير من الداخل عبارة
عن آيات على تداخل هندسى على نقوش عربية وتحليات بالنحاس والقيشانى والخشب.
وفيه سر كبير عاوزينكم تعرفوه لأننا عرفناه من د. ضحى
اللى كانت بـ تزور المكان هناك كثير، وهو أن الغرفة اللى كانت بـ تتعبد فيها
السيدة نفيسة لسه موجودة لحد دلوقتى وبـ يزورها ناس كثير جدًا وممكن كمان يقعدوا
فيها يومين أو ثلاثة، يعنى حالة كده من الاستجمام والراحة النفسية وفيه ناس مشهورة
جدًا بـ تروح هناك منهم ممثلين وإعلاميين ورجال سياسة.
الغريب بقى فى الموضوع أن أغلب الناس اللى بـ تزور
السيدة نفيسة من طبقة غنية ومتعلمة تعليم عالى زى ما بـ يقول علماء الاجتماع واللى
بـ يرجعوا الفكرة دى إلى أن السيدة نفيسة اشتهرت بأنها نفيسة العلم وعلشان كده
اللى بـ يزورها بـ يحاول يكون قريب من نفس المستوى ده يعنى يكون متعلم، وزى ما
قولنا قبل كده أن فتح صندوق النذور بتاع السيدة نفيسة وضح لنا قد إيه أن طبقة
متعلمة هى اللى كانت بـ تبعث الورق.
لكن سيبونا من ده إحنا لسه ما قولناش حاجة عن السيدة
نفيسة، لما تروح تزور مقام السيدة نفيسة مبدئيًا لازم تعرف أنها بنت الإمام حسن
الأنور بن زيد بن الحسن بن على بن أبى طالب، ولدت عام 145 هـ فى مكة وكانت تربيتها
فى المدينة المنورة وتعلمت من كثير من نساء الصحابة وكانت بـ تحب قراءة القرآن
والعبادة فى حرم النبى صلى الله عليه وسلم وكان والدها بـ يأخذها لحجرة النبى
الكريم ويقول: “يا رسول الله أنا راض عن ابنتى نفيسة”، وبـ تقول
الحكايات أن الرسول جاء له فى المنام وقال له: “يا حسن أنى راض عن ابنتك
نفيسة برضاك عنها، والحق سبحانه وتعالى راض عنها برضاى عنها”، المهم تزوجت
السيدة نفيسة وأنجبت القاسم وأم كلثوم لكنهم ماتوا وهما صغار، ومات زوجها وسافرت
إلى مصر وهناك اشتهرت بعلمها وحبها للمصريين جدًا وتعلقوا بها ومنهم اللى درس على يديها،
وبـ يقال أن الإمام الشافعى كان من اللى درسوا على يديها، ولما توفى قالت:
“رحم الله الشافعى كان رجلاً يحسن الوضوء”.
وعلشان المصريين حبوها سموها بكثير من الألقاب زى: نفيسة
العلم والدارين، والسيدة الشريفة العلوية والسيدة النقية، والعفيفة والساجدة
والمتبحرة وأم العواجز وفرع الرسالة، وجناح الرحمة، ونفيسة المصريين.
وطبعًا فيه كثير من الكرامات اللى بـ يحكيها الشعب
الجميل عن السيدة نفيسة ومنها أن واحد غلب الأطباء فى مرضه، فدعت له السيدة نفيسة
وتم الشفاء، والبنت اللى تركها أبوها وهى مصابة بالشلل فمرت عليها السيدة نفيسة
ودعت لها ومسحت على قدمها فـ قامت البنت ومشيت، وطبعًا فيه كرامات كثير ثانية لازم
تروح هناك علشان تبدأ تتعرف على الكرامة من قريب أو على الأقل تحس بها لما تروح، إيه
رأيك؟ جرب وروح.
