The Definitive Guide to Living in the Capital , Cairo , Egypt

متحف الفن المصري الحديث الموجود في دار الأوبرا المصرية في الزمالك بـ يعرض مجموعة من اللوحات والأعمال النحتية المعاصرة لفناني مصر على مر العصور. بعد فترة تحسينات طويلة، تم افتتاح المتحف مرة ثانية لاستقبال محبي الفن، واللي من خلال جولتهم للمتحف هـ يقدروا يتفرجوا على أشهر اللوحات المصرية.

من أهم اللوحات المعروضة في المتحف هي لوحة "المدينة" لرائد الفن المعاصر في مصر الفنان محمود سعيد، واللي تعتبر في حد ذاتها توثيق لملامح الحياة المصرية في زمن فات. وده واضح من خلال ملابس البطلات اللوحة بالملايات اللف والبرقع، وعلى يمينهم بائع العرقسوس بزيّه المميز، ده بالإضافة لعناصر كثيرة مختلفة -زي المباني القديمة- في اللوحة بـ توضح صورة من صور الحياة في مصر.  

بالرغم من أن الدور الأول يعتبر متحف دائم لأعمال فنانين كبار زي الفنان محمود مختار، إلا أن كل ثلاث لخمس سنين معروضات المتحف في الأدوار الثانية بـ تتغير. وبالرغم من أن المتحف كان بقى له زمن مغلق للتجديدات، إلا أن للأسف الأدوار الثانية لسه مش مجهزة لاستقبال الزوار، ولكن الجزء المضيء في الموضوع أن المتحف دخوله بالمجاني بعكس أماكن أخرى.   

اللي غاويين متاحف وجاليريهات عارفين أن الأماكن دي حلاوتها أنك تتأمل كل لوحة على مهل؛ مش بس من ناحية تفاصيلها، ده كمان علاقة كل لوحة وموقعها باللوحة اللي بجانبها. يعني مثلًا لوحة "الراهبة"، واللي خلفيتها المظلمة خلت بطلة اللوحة اللي ركعت للصلاة تظهر أكثر بوجه مضيء، من وجهة نظرنا حجم اللوحة الخرافي وأهمية البطلة في اللوحة مع موقع اللوحة العالي نسبيًا –واللي يخليك ترفع رأسك علشان تشوفها- أوحى لنا أن بطلة اللوحة هي السيدة العذراء.  

أرضيات المتحف الرخامية هـ تأخذك لمجموعة من الأعمال البرونزية  المجمعة في موقع واحد، وده بـ يبين أهمية النوع ده من الفنون في مصر. فيه كمان مجموعة ثانية من الأعمال النحتية في الساحة الخارجية للمتحف بالأخص، وفي مساحة دار الأوبرا بالأعم. موقع المتحف ممتاز، لأنه بين مجموعة من الجاليريهات –زي جاليري الباب سليم، قصر الفنون والمسرح الكبير- اللي ممكن تمد بها جولتك الفنية في مكان واحد.

جولتك في متحف الفن المصري الحديث مش جولة ثقافية أو فنية بس، لأن اللوحات المعروضة هـ تدخلك عالم مختلف كفيل أنه يحرك مشاعر مختلفة جواك.