The Definitive Guide to Living in the Capital , Cairo , Egypt

من بين عشرات الأماكن اللي بتقدم ورش تعليم لحرف ومهن يدوية، صعب إنك تلاقي مكان بيعلم بحرفية شديدة وعلى أساس علمي جنب الخبرة كمان، وبيتابع كمان كل واحد اتعلم وصل لفين ومحتاج إيه، وإيه اللي ناقصه لحد مايقف على رجليه، ودي كلها معادلة صعب تتحقق لو حطيت قدامها العائق او التكلفة المادية للورش دي.

المكان اللي هنتكلم عنه النهارده مش بس قدر يحقق المعادلة الصعبة دي، لأ ده كمان بأسعار بسيطة في متناول أي حد لسه بيبتدي مشوار الألف ميل.

(Creative Hub- كرييتف هب) مكان شعاره “لما الأفكار تلمع” مش جاي من فراغ، وده لإن معظم الأفكار السهلة والبسيطة واللي ليها علاقة بالأشغال والحرف والصناعات اليدوية واللي بنفكر فيها لكن دايمًا عندنا مشكلة في تنفيذها أو تطبيقها، بتتنفذ وتتطبق و تلمع في المكان ده.

(كرييتف هب) بيوفر مجموعة من الورش العملية لصناعات يدوية مميزة وراقية جدًا، وبتتميز بمجموعة من المميزات اللي بتخلي المكان ده مختلف عن غيره من الأماكن اللي بتوفر الورش دي، وأهم ميزة من المميزات دي هي المجموعة الكبيرة من أساتذة ودكاترة كليات الفنون الجميلة والفنون التطبيقية اللي مش بس بيشرفوا على الورش، لأ دول بيدوا الورش بنفسهم وبإيديهم، يعني هتتعلم على إيد دكاترة جامعة محترفين.

المكان بيوفر مجموعة كبيرة من ورش الصناعات والحرف اليدوية، منها مثلًا ورشه الزجاج المعشق بالنحاس، واللي بنتعلم فيها إزاى ننفذ شكل مجسم من الألف للياء، بداية من تقطيع الزجاج، لحد التعشيق بصفائح النحاس بزوايا وأشكال مختلفة.

ده غير دورة تدريبية فى صناعات المشغولات الجلدية، واللي هنتعرف فيها على كل حاجة ليها علاقة بالجلد وألوانه وصباغته وأنواعه وطرق تشكيل كل نوع.

كمان المكان بيقدم كورس لتعليم فن تطريز “التلى” وهو فن التطريز بخيوط معدنية فضية وذهبية، والفن ده من التراث النادر اللي اتولد في مدينة أسيوط.

ده غير كورسات وورش عمل متعددة ومختلفة لحرف مبدعة، يمكن ماكناش نتخيل في يوم إننا ممكن نعملها، منها مثلًا فن الطباعة علي المنسوجات، وفن الموزاييك، والديكوباج، والأميجورومي، وورش دهان وتجدد قطع الديكور الخشبية، وقشره الخشب، وتعليم فن صناعة الشموع، وغيرها كتير، ممكن تتعرف عليهم من هنا.

الكورسات أو الورش كلها مددها بتتراوح ما بين اليوم الواحد أو الشهر، على حسب الورشة وعدد ساعاتها في اليوم، وأسعار الورش دي بتبقى في متناول أي حد حابب يتعلم حرفة تبقى مصدر دخل ليه بعد كده، أو حتى من قبيل الهواية وتنمية الذات.

ممكن تتعرفوا على تفاصيل المكان والورش اللي بيقدمها وأسعارها من خلال صفحتهم على الفيس بوك من هنا.