The Definitive Guide to Living in the Capital , Cairo , Egypt

في شارع عبد الخالق ثروت بوسط القاهرة، هتقابلك مكتبة بواجهة زجاجية كلاسيكية، مكتبة عتيقة مليانة كتب بلغات أجنبية منها الإنجليزية والألمانية، ده غير الصور المدهشة اللي بتحكي تاريخ مصر، والقطع الفنية اللي هتخليك تحس إنك في جاليري مش مجرد مكتبة. بنتكلم عن “لينرت ولاندروك” أقدم المكتبات الأجنبية في مصر والشرق الأوسط.

بيقول تقرير نشره موقع صحيفة الشرق الأوسط إن حوائط وجدران المكتبة بيميزها أعمال من التراث الشرقي والمصري، بتحمل لقطات من حكايات البشر المرئية بترويها وجوه وملامح مصريين عاشوا في زمن قديم، وصور فيها تفاصيل من تاريخ مصر ومعالمها الشهيرة وإزاي غيرتها تقلبات الزمن عبر أكثر من 100 سنة.

بيرجع تاريخ مكتبة “لينرت ولاندروك” إلى عام 1904، لكن الصور الموجودة في المكتبة بيعود تاريخها إلى تاريخ أقدم! يمكن أواسط القرن الـ19.

بمجرد دخولك للمكتبة، اللي كان مقرها الأول في شارع شريف لكنها انتقلت مؤخرًا لشارع عبد الخالق ثروت، هتنسى الدنيا من جمال الصور الفوتوغرافية اللي التقطتها عدسة الفنان “لينرت رودلف فرانز” (1878 – 1948) المولود في بوهيميا بأوروبا الوسطى، واللي كان بيعشق التصوير، واللي سافر تونس سنة 1903 وبهره سحرها. في تونس قابل صديق عمره رجل الأعمال “لاندروك أرنست هينرش” (1878 – 1966) المولود في مقاطعة “راينسدوف ساكسون” الألمانية، واللي شاركه الهوس بفكرة تصوير الأماكن والأشخاص.

اتفق الاثنين على مشروع يجمعهم، هيكون مسؤول فيه “لينرت” عن التصوير والإبداع، و”لاندروك” عن التمويل وتولي عملية بيع الصور وتسويقها.

سنة 1924 وصل “لاندروك” لمصر مع زوجته، ووصل كمان “لينرت” مع زوجته، وفي القاهرة أسسا “شركة لينرت ولاندروك” في عمارة (بناني) رقم 21 بشارع عدلي بوسط القاهرة. بعدها أسسا مقر بشارع الجمهورية، لعرض بطاقات بريدية وصور ومطبوعات فنية وكروت المعايدة، وكان موقعه ما بين فندقي شبرد والكونتيننتال، في الوقت ده لف “لينرت” كل مصر، من الإسكندرية للنوبة، ووثق بكاميرته الحياة في مصر وساب لنا تراث ثري من آلاف الصور النادرة.

أصبحت مكتبة “لينرت ولاندروك” علامة مميزة في بيع الكتب التاريخية والسياحية عن مصر وأوروبا باللغات الأجنبية، وقدرت على الصمود رغم كل الصعوبات والحروب والأزمات الاقتصادية اللي مرت على مصر خلال القرن العشرين.

المكتبة بتضم كمان لوحات وأعمال فنية أصلية لكبار الفنانين في العالم، وتمنحك “لينرت ولاندروك” شهادة موثقة تثبت بأنك بتمتلك صورة أصلية من مجموعة “لينرت ولاندروك” النادرة.

المكتبة كنز حقيقي للصور والبراويز واللوحات والكتب المصورة والمفكرات الرائعة اللي بتحمل صور عظيمة ونادرة لمصر، ده غير القطع الخزفية والرخامية والمزهريات والثريات المصنوعة من الملح السيوي أو المشغولات السيناوية وغيرها.

عنوان المكتبة الحالي: 36 شارع عبد الخالق ثروت.