The Definitive Guide to Living in the Capital , Cairo , Egypt

القاهرة عاصمة مميزة بحاجات كتير. منها معارضها المتخصصة اللي بتتجمع عدد كبير من المتخصصين في مجال معين، ومن معارض القاهرة اللي لازم تزورها الفترة دي علشان تستمتع بمعروضاتها، معرض “تراثنا” للحرف اليدوية والتراثية 2020، واللي بيضم مجموعة ضخمة من المنتجات الفنية اللي بتعتبر عن هوية بلدنا بتنوعها الكبير، واللي أغلبها مصنوع “هاند ميد”، والمنتجات دي أكيد هتضيف لمسة فنية مميزة لبيتك.

وفي السطور الجاية هنقول لك على معلومات مهمة عن المعرض اللي فاتح لك أبوابه مجانًا الفترة دي، وبيقدم منتجات مميزة بسعر مناسب.

أول حاجة مهم تعرفها هي إن معرض “تراثنا” للحرف اليدوية والتراثية، هو حدث بينظمه جهاز تنمية المشروعات المتوسطة والصغيرة ومتناهية الصغر.

والمعرض نوع من أنواع الدعم العملي من الحكومة المصرية لقطاع الصناعات التراثية والحرف اليدوية لأهميته الاقتصادية والثقافية والعمل على التوسع في الترويج للفنون العريقة دي وإتاحة منتجاتها الرائعة بأسعار تجارية من خلال المعرض.

وبيشارك في المعرض السنة دي أكتر من 600 مشروع وعارض من جميع محافظات مصر، منهم على سبيل المثال 35 عارض من صناع الأثاث بدمياط، ده غير المئات من المشروعات المصرية المشهورة بإنتاجها اليدوي والفني الفريد وإبداعات كبار الحرفيين والصناع المهرة والفنانين من مختلف محافظات الجمهورية.

وبيوفر معرض تراثنا منتجات عملية وفنية وبجودة عالية بأسعار تجارية مناسبة للكل من أجل تشجيع انتشارها وزيادة إنتاجها.

بيشارك في المعرض مجموعة متميزة لوزارة الثقافة ممثلة في قطاع الفنون التشكيلية ومركز الحرف التقليدية بالفسطاط ووزارة الشباب والرياضة والمجلس القومي للمرأة وغرفة الأثاث وكرييتف إيجيبت باتحاد الصناعات والمجلس التصديري للحرف اليدوية.

المعرض موجود في مركز مصر للمعارض الدولية بالتجمع الخامس، ودخوله مجانًا، وفيه إجراءات للوقاية من فيروس “كورونا” المستجد.

معرض تراثنا فاتح أبوابه للجمهور الفترة دي من الساعة العاشرة صباحًا وحتى العاشرة مساء مساءً، وهيستمر لحد يوم الخميس الموافق 15 أكتوبر.