كل اللي محتاجين تعرفوه عن مهرجان “الهند على ضفاف النيل” 2020
الهند على ضفاف النيل الهند في القاهرة بولييود مواعيد عروض الهند على ضفاف النيل
Cairo 360
مصر بتستعد لاستضافة أهم وأكبر مهرجان هندي على أرضها، وهو مهرجان “الهند على ضفاف النيل” السنوي، واللي دورته الثامنة واللي هتقام في الفترة من 2 ولحد 10 مارس 2020، هتكون مختلفة ومميزة عن أي دورة سابقة.
المهرجان الدولي هيشهد السنة دي مجموعة مختارة من العروض والأنشطة الفنية الهندية البارزة، واللي هيتم عرضها في المدن المصرية الجميلة، زي القاهرة والإسكندرية وبورسعيد والفيوم.
مهرجان “الهند على ضفاف النيل”، بتنظمه شركة عالمية مميزة، وهي “Teamwork Arts” ، المتخصصة في عرض الفن الهندي في المهرجانات في كل أنحاء العالم، وده بيتم بالتعاون مع السفارة الهندية في القاهرة.
دورة السنة دي من “الهند على ضفاف النيل” هتشهد عرض “En Route to Bollywood”، أو “الطريق إلى بوليوود”، وده عرض ضخم ومميز بيضم أهم وأشهر الأغاني الهندية الشهيرة من أفلام بوليوود اللي كلنا اتربينا عليها وحبيناها، وهيكون في فنانين هيرقصوا على الأغاني دي على المسرح، يعني هنشوف بوليوود الحقيقية في مصر.
ومواعيد العرض ده هي:
في القاهرة
6 مارس، فاميلي بارك، القاهرة الجديدة، 7:30 مساءً.
7 مارس، مسرح الجمهورية، الساعة 8 مساءً.
في بورسعيد
5 مارس، مدرسة بورسعيد الدولية، 7:30 مساءً.
الإسكندرية
8 مارس، مكتبة الإسكندرية، 7:30 مساءً.
الفيوم
10 مارس، جامعة الفيوم، 3:00 مساءً.
وللناس اللي نفسها تتعلم رقص هندي من اللي بنشوفه في الأفلام الهندية، ممكن تحضروا ورش عمل لتعليم رقص بوليوود، اللي بيقودها الراقص الفرنسي ومصمم الرقصات في الهند “Gilles Chuyen”.
جدول ورش الرقص:
القاهرة
4 مارس، مركز الهناجر للفنون، 4 مساءً.
6 مارس، فاميلي بارك، القاهرة الجديدة، 4 مساءً.
9 مارس، جامعة حلوان (حرم الزمالك)، 10:30.
9 مارس، جامعة 6 أكتوبر، الساعة 2 بعد الظهر.
بورسعيد
5 مارس، مدرسة بورسعيد الدولية، 4 مساءً.
لسة مفاجآت “الهند على ضفاف النيل” مستمرة، وهيكون موجود السنة دي كمان تجربة مميزة ومختلفة هتقدمها شركة “Astha Dixit Dance “، من خلال عرض لواحدة من أقدم أشكال الرقص الكلاسيكي الهندي، وهي رقصة “kathak”.
وهتقام التجربة دي في القاهرة، على مسرح الجمهورية، يوم 8 مارس، الساعة 8 مساءً.
“الهند على ضفاف النيل” لسة مكمل أنشطته المميزة، والسنة دي كمان هسيشهد المهرجان لمحة عن ثقافة ولاية “راجاستان” الهندية العريقة، وهيكون فيه عدد كبير من الموسيقيين الشعبيين اللي جايين لمصر مخصوص من ولاية “راجاستان”.
والعرض ده هيكون في القاهرة، وبالتحديد في إنتركونتيننتال سميراميس، يوم 4 مارس 2020، الساعة 7.30 مساءً.
وطبعًا ماينفعش يكون فيه مهرجان هندي في مصر ومايكونش فيه جلسات اليوجا وجلسات استرخاء تنقلنا لعالم تاني من السعادة والراحة النفسية.
والجلسات السنة دي هتكون في محافظة الفيوم، بجامعة الفيوم، يوم 10 مارس 2020، الساعة 3 العصر.
نيجي بقى لحاجة هتهم كل الأكيلة في مصر، وهي الجزء الخاص بالأكلات الهندية المميزة، وطبعًا كلنا عارفين جمال الأكل الهندي، والمهرجان السنة دي هيقدم لنا فرصة لتذوق الأطباق الهندية اللذيذة.
ومهرجان الأكل الهندي هيكون من يوم 4 ولحد 8 مارس 2020، الساعة 7 مساءً، في فندق إنتركونتيننتال القاهرة، وللحجز اتصلوا على: 0227988188.
وبنفكركم تاني إن المهرجان هيكون في من يوم 2 ولحد 10 مارس 2020.
والسفارة الهندية بالقاهرة هتنظم مؤتمر صحفي بمشاركة مسئولي وزارة الثقافة المصرية، وده هيكون الساعة 11 صباحًا، يوم الإثنين الجاي، الموافق 2 مارس، في فندق سميراميس إنتركونتنتال- جاردن سيتي.
علشان تعرفوا كل المواعيد وتتعرفوا على تفاصيل أكتر اضغطوا هنا.
مقترح
معالم وسياحة
متحف الصيد: مغامرة في قلب القاهرة هتاخدك لعالم الأدغال
تاريخ مصر حيوانات محنطة +7
أفلام
