كتب وأنشطة وأكثر.. رحلة ممتعة لـ5 مكتبات عامة في القاهرة
أتشطة مكتبية استعارة كتب دورات تدريبية مكتبات القاهرة مكتبة مكتبة مصر
Mohamed Talaat
الإجازات بدأت، وكتير مننا بيحبوا يعملوا أنشطة مختلفة ويروحوا أماكن جديدة ومناسبة للكبار والأطفال، ولأن القراءة واللعب والأنشطة مهمين لنا سواء كنا كبار أو صغار فالمكتبات العامة في القاهرة هي أفضل وجهة علشان نعمل كل ده، لأنها بتقدم كتب للقراءة وأنشطة للأطفال لتنمية مواهبهم وقدراتهم، وكمان بيعملوا فعاليات ودورات مختلفة مناسبة للجميع، وخلينا ناخد جولة نتعرف من خلالها على 5 مكتبات في القاهرة يستحقوا الزيارة بجد.
مصر العامة
بعيدًا عن الكتب اللي متوفرة بكل مجالاتها هما كمان بيعملوا دورات تدريبية للغات والكمبيوتر والجرافيك وغيرها، ده غير تنمية المهارات للأطفال، وكمان بيعملوا فعاليات وحفلات توقيع كتب وغيرها، وهي مناسبة لكل الأسرة.
العنوان: 4 شارع جمال حمدان متفرع من شارع النيل بجوار مبنى سفارة السعودية – الدقي.
وتقدروا تعرفوا أكتر عن نشاطتهم من هنا.
مصر الجديدة
من المكتبات المهمة في تقديم كل اللي يهم الأسرة، وتعتبر من المكتبات المميزة اللي بتقدم دورات تدريبية وورش في مختلف المجالات ومشهورة بحفلات التوقيع والأنشطة والفعاليات المتسمرة.
العنوان: 42 شارع العروبة – مصر الجديدة.
وتقدروا تعرفوا أكتر عن نشاطتهم من هنا.
البحر الأعظم
بتقدم المكتبة ورش وتدريبات كتير، وكمان بتقدم أنشطة وفعاليات للأطفال في تنمية المهارات والذكاء، ده غير المسابقات اللي بتكون متخصصة للأطفال والدورات الخاصة بالتكنولوجيا وكمان بيعملوا فيها حفلات توقيع وغيرها من الأنشطة المميزة.
العنوان: شارع البحر الأعظم بجوار قسم شرطة الجيزة.
وتقدروا تعرفوا أكتر عن نشاطتهم من هنا.
القاهرة الكبرى
مبهرة من أول ما تدخلوها بمبناها وديكوراتها وموقعها. بتقام فيها فعاليات كتير وورش عمل وحفلات توقيع وندوات وحفلات موسيقية وغيرها من الأنشطة بجانب نشاط القراءة والاستعارة زي كل المكتبات.
العنوان: 15 شارع محمد مظهر – الزمالك.
وتقدروا تعرفوا أكتر عن نشاطتهم من هنا.
المعادي
من المكتبات اللي بتهتم بالأطفال وبتعمل دورات لهم في العلوم والرسم والمشغولات واللغات والزومبا واليوجا، ده غير كمان الرحلات للأماكن التاريخية والأثرية للأطفال والكبار، وكمان بتقدم دورات لغات وكمبيوتر وأنشطة كتير، بجانب نادي السينما للأطفال.
العنوان: 2 شارع النصر – أمام القرية الأوليمبية – المعادي.
وتقدروا تعرفوا أكتر عن نشاطتهم من هنا.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
