The Definitive Guide to Living in the Capital , Cairo , Egypt

الصورة: موقع كايرو كوميكس.

القاهرة جميلة بمهرجاناتها اللي بتغطي مجالات مبهجة في الحياة، زي مهرجان القاهرة الدولي للقصص المصورة، المعروف باسم مهرجان كايروكوميكس، وده مهرجان سنوي للقصص المصورة بيعقد في القاهرة من سنة 2015، وبيعد الأول من نوعه، وبيهتم المهرجان بشكل خاص بتطور الحركة المستقلة لفن القصص المصورة في مصر وعلى نطاق أوسع في الشرق الأوسط وشمال أفريقيا.

تعالوا نتعرف على المهرجان وحكايته وتفاصيل دورته الجديدة.

تاريخ كايرو كوميكس

بدأت فكرة المهرجان لما قام مجموعة من الفنانين، وهم مجدي الشافعي ومحمد شناوي وتوينز كارتون (محمد وهيثم رأفت) بمبادرة اُعلنت في مارس 2015 لإقامة إحتفالية فنية تجمع الجمهور مع فناني القصص المصورة العرب والأجانب وبتقدم لأول مرة جوائز مختلفة، زي جائزة أفضل قصة مصورة باللغة العربية وأكثر.

بيهدف المهرجان لإقامة تجمع لفناني الكوميكس من مصر وخارجها، وللتعرف على المدارس المختلفة كالمدرسة الفرنسية، وفي المهرجان بتتوفر كثير من كتب القصص المصورة للشراء، وبيتميز المهرجان كمان بوجود فن الكوسبلاي، بمعنى وجود بعض الأشخاص متنكرين بشخصيات الكارتون والأنمي.

كايرو كوميكس 2024

الدورة الـ9 من مهرجان كايرو كوميكس هتكون في الفترة من 1 وحتى 3 نوفمبر 2024. المهرجان هيكون زي كل سنة في مركز محمود مختار الثقافي، وعنوانه: 5 شارع التحرير، الجزيرة. القاهرة.

تقدر توصل عن طريق المترو، هتنول محطة مترو الأوبرا، وهتتمشى دقيقة في اتجاه ميدان الجلاء وهتلاقي نفسك أمام متحف محمود مختار.

شخصية السنة دي هي “كسلان جدًا” للفنان مصطفى رحمة. بالإضافة لمعرض كتاب من قتل أسمهان للور إبراهيم ونادية صفصف ومعرض كتاب آخ يا ظهري لخالد نهار (الأردن). وبتضم فعاليات المهرجان كمان ورش عمل بورتفوليو مع الضيوف: سيمونا جابرييللي (سويسرا) وخالد نهار(الأردن) وبيلار ميتشين (الأرجنتين) واللقاءات الفنية مع: رانيا أمين ومصطفى رحمة وخالد نهار ومنى الزّق ومحمد صلاح.

وفي سوق الكوميكس في 2024 هيكون فيه أكبر تجمع لناشري القصص المصورة في مصر، ده غير ساحة الفنانين المستقلين لعرض وبيع معروضاتهم من الكتب والرسوم.

المواعيد: يوميًا من 12 ظهرًا وحتى الساعة 8 مساءً.

الدخول مجاناً.