في قصر “المانسترلي”.. استعدوا لحضور فعاليات الأسبوع الفرنسي بالقاهرة
الثورة الفرنسية المعهد الثقافي الفرنسي في مصر بيتهوفن رافايل فيار سيرانو دي برجراك سينما فن فيرجيني فوكار قصر المانسترلي مايليس دو كرانجال مسرح موسيقى هشام جبر
Cairo 360
الصورة الرئيسية للفنان: يوحنا ناصيف
تحديث: تم إلغاء الفعاليات بسبب الأحداث الأخيرة المتعلقة بالوقاية من كورونا.
بعد أيام قليلة، وتحديدًا يوم 9 مارس الحالي، هتشهد القاهرة حدث فني وثقافي مميز، وهيكون برعاية وتنظيم المعهد الفرنسي في مصر، بمناسبة شهر الفرانكفونية.. والحدث ده هو “الأسبوع الفرنسي” واللي هنشوف ونستمتع فيه بفعاليات مخصصة للإبداع الكلاسيكي.. تعالوا بينا نتعرف على برنامج “الأسبوع الفرنسي” واللي هيضم حفلات موسيقية، ولقاءات أدبية، وعروض للصغار، وعروض مسرح وسينما، وأوبرا، وهيستمر في الفترة من 9 لـ 14 مارس 2020 في قصر المانسترلي بالقاهرة.
عرض مُسجل لـ “أوبرا كارمن”:
هتكون بداية الأسبوع الفرنسي بالموسيقى والأغاني الشعرية، مع العرض الأوبرالي الساخر “أسطورة كارمن” واللي بيحكي عن “كارمن” المرأة الحرة اللي بتعمل اللي عايزاه ومالهاش دعوة بحد ولا بعادات ولا بتقاليد.
العرض هيكون مجاني، وهيقدم يوم الإثنين 9 مارس، الساعة 8 مساءً.
مدة العرض 3 ساعات، وهيقدم باللغة الفرنسية.
عرض مُسجل لمسرحية “سيرانو دي برجراك”:
في ثاني أيام الأسبوع الفرنسي، هنستمتع بمشاهدة المسرحية الشهيرة “سيرانو دي برجراك” للشاعر “إدموند روستان”.
هنعيش في المسرحية مع 5 فصول من أنواع مختلفة من الفنون، من أول فن الأوبرا الساخرة، مرورًا بالتراجيديا، والدراما، وهنستمتع بحكاية “سيرانو دي برجراك” اللي على الرغم من إن شكله ماكانش حلو بسبب أنفه الكبير، إلا إنه شجاع ومتكلم وشاعر، وفي مرة بنت عمه “روكسان” اللي كان بيحبها في الخفاء، هتعترف له بحبها لشخص تاني وهو “كريستيان” الشاب النبيل اللي عنده كله حاجة ممكن البنت تتمناها، إلا إنه مش بيعرف يقول شعر ولا كلام رومانسي.
المفارقة إن “كريستيان” هيطلب من “سيرانو” إنه يساعده في الفوز بقلب “روكسان” من خلال كتابة الشعر.. فيا ترى “روكسان” هتعرف الحقيقة؟ وإيه اللي هيحصل لـ “سيرانو”.. ده اللي هنعرفه في المسرحية.
مدة العرض 3 ساعات، وهيقدم باللغة الفرنسية، وهنشوفه يوم الثلاثاء 10 مارس الساعة 8 مساءً.
مناقشة مع الكاتبة “رافايل فريير” عن أعمالها، وكتب الأطفال:
يوم الأربعاء 11 مارس، الساعة 5 مساءً، هنكون على موعد مع الكاتبة الفرنسية “رافايل فريير”.
الكاتبة من مواليد مدينة ليون سنة 1970، وليها مؤلفات مهمة، صادرة عن دور نشر مرموقة من بينها Rue du monde و Thierry Magnier و Talents hauts وليها إنتاج متنوع بيتضمن قصص مصورة وروايات وقصائد شعر للأطفال وكتب للمراهقين.
قصتها المصورة “ورطة بليز – Le Tracas de Blaise” خدت جائزة “الشذرة الذهبية” في معرض “مونترويل” للكتاب وصحافة الأطفال، وتعتبر أهم جائزة لكتب الأطفال.
رافايل فريير ليها أنشطة تانية غير الكتابة، فمثلًا أخرجت عروض موسيقية معظمها مستلهم من أعمالها، وكمان مثلت فيها، ده غير إنها بتعمل حلقات كتابة للأطفال والمراهقين والكبار في المدارس والمستشفيات والمهرجانات.
اللقاء هيكون باللغة الفرنسة مترجم ترجمة فورية، وهيشارك في تنظيمه مكتبة Livres de France.
لقاء مع الروائية “مايليس دو كرانجال”:
اللقاء الثقافي الثاني ضمن فعاليات الأسبوع الفرنسي هيكون مع الروائية الفرنسية “مايليس دو كرانجال” بمناسبة صدور روايتها “شفاء الأحياء” باللغة العربية عن دار آفاق، وهتتحاور معاها خلال اللقاء د. رانيا فتحي – رئيسة قسم اللغة الفرنسية وآدابها في جامعة القاهرة.
“مايليس” تعتبر واحدة من أهم الكتاب في فرنسا، وحصلت علي جوائز كتير، وترجمت أعمالها لعشرين لغة، ومن أشهرهم “كورنيش كينيدي” (2008) و”ظهرَ جسرٌ” (2010) و”المنحني الشرقي” (2012)، وفي 2014 روايتها “شفاء الأحياء” خدت عشر جوائز، واتعملت فيلم ومسرحية.
اللقاء هيكون يوم الأربعاء 11 مارس، الساعة 7 مساءً.
ندوة عن “بيتهوفن” والثورة الفرنسية:
قائد الأوركسترا والمدير الفني لقصر المانسترلي “هشام جبر” هيكلمنا في إطار سلسلة ندواته المنعقدة تحت عنوان “التذوق الموسيقي” عن النمط البطولي لعبقرية بيتهوفن، وتحديدًا في سيمفونيته الـ 3 اللي أهداها لـ “نابليون بونابرت” وبعدين شطب الإهداء ده، وكمان هيتكلم عن الصلات اللي ربطت بين بيتهوفن والثورة الفرنسية.
الندوة هتكون على مدى ساعتين بـ (اللغة العربية) وهتبقى يوم الخميس 12 مارس الساعة 7 مساءً.. والدعوة عامة.
قراءة موسيقية ” Les Chaises ” مع “رافايل فيار” و”الثنائي ايميليبيير”:
المؤلفة والكاتبة “رافايل فيار” هتقدم نسخة موسيقية مترجمة للعربي من أشعارها، وهيصحبها في ده الثنائي الموسيقي “ايميليبيير”.
الفاعلية هتكون يوم الجمعة 13 مارس الساعة 3 العصر، ولمدة ساعة واحدة، وهتقدم باللغتين الفرنسية والعربية، والدعوة عامة.
ريسيتال عن الشرق المُتخيل مع “فيرجيني فوكار”:
في ختام موسيقي للأسبوع الفرنسي، المعهد الفرنسي بيقدم السوبرانو “فيرجيني فوكار” علشان نستمتع معاها بعزف لريسيتال من خمسة ألحان فرنسية، تم تلحينها مخصوص للمناسبة دي، وهيكون معاها عازفة البيانو “الينا جرايشنكو”
العرض هيكون مدته ساعة و30 دقيقة، وهيبقى يوم الجمعة 13 مارس الساعة 8 مساءً.. والدعوة عامة.
لو عاوزين تعرفوا تفاصيل أكتر عن أحداث وفعاليات الأسبوع الفرنسي.. زوروا صفحة “المعهد الفرنسي في مصر” على الفيسبوك من هنا.
مقترح
الحياة في كايرو
